sexta-feira, 8 de junho de 2018

Ofisiálmente Koronél Haat Simu Pose Ba Brigadeiru Jenerál

PARTILHAR

DILI, (TATOLI) - Ofisiálmente koronél na’in haat (4) simu pose nu’udar brigadeiru jenerál iha Palásiu Prezidente Nicolau Lobato, Bairru Pité, Dili, kinta (7/6) loraik ne’e.

Prezidente Repúblika, Francisco Guterres Lú Olo, nu’udar Komandante Supremu FALINTIL-Forsa Defeza Timor-Leste (F-FDTL) maka dirije serimónia promosaun ba koronél hirak ne’e.

Superiores F-FDTL ne’ebé simu promosaun maka hanesan Koronél Domingos Raul “Falur Rate Laek” promovidu ho Dekretu Prezidente Repúblika nú. 14/2018/30 Maiu, Koronél Américo Ximenes “Sabica Bessi Kulit” promovidu ho  Dekretu Prezidente Repúblika nú. 15/2018/30 Maiu, Koronél Cornélio Ximenes “Maunana” promovidu ho Dekretu Prezidente Repúblika nú. 16/2018/30 Maiu no Koronél João Miranda “Aluc Descartes” promovidu ho Dekretu Prezidente Repúblika nú. 17/2018/30 Maiu.

Entretantu, liuhusi diskursu, Xefe Estadu Maior F-FDTL, Majór Jenerál Lere Anan Timur, hato’o agradesementu ba Sétimu Governu Konstitusionál ne’ebé ho vontade polítika promove koronél na’in haat refere.

Tuir Lere katak koronél haat merese hetan promosaun tanba nu’udar veteranu ne’ebé dedika sira nia án hodi liberta pátria iha tempu defisil no hola parte hodi kontribui mós harii Estadu hafoin ultrapasa konflitu naruk durante tinan 24 nia laran.

Nia mós fó agradesementu ba Prezidente Repúblika ne’ebé aseita pedidu promosaun hosi Governu hodi promove koronél hirak ne’e.

Eis Komandante Gerileiru ne’e husu ba Governu foun ne’ebé mai atu kontinua aktu ida ne’e (promosaun ofisiál F-FDTL), nune’e bele halakon insjustisa ba veteranu sira ne’ebé mártir ona no sira ne’ebé sei moris.

Iha fatin hanesan, Prezidente Repúblika, Francisco Guterres Lú Olo, esplika katak koronél na’in haat iha esperiénsia no iha motivasaun ne’ebé maka’as atu fó kontribuisaun ba nasaun ida ne’e liuhusi instituisaun Forsa Armada.

Xefe Estadu hatutan veteranu na’in haat ho veteranu sira seluk nia dedikasaun ba nasaun boot tebes tanba liuhusi kondisaun luta ne’ebé susar tebes.

“Ita restaura ona ita nia independénsia nasionál, tan ne’e, Estadu iha responsabilidade hodi fó omenajen ba eroi sira ne’ebé fó án ba mate durante luta libertasaun nasionál no lala’ok ida seluk maka oinsá Estadu rekonhese veteranu sira ne’ebé oras ne’e hala’o responsabilidade hodi serbí Estadu,” Lú Olo afirma.

Iha biban ne’e, Brigadeiru Jenerál Promovidu, Domingos Raul “Falur Rate Laek” reprezenta nia maluk brigadeiru jenerál promovidu sira seluk hateten kna’ar ne’ebé sira asumi todan no to’os tanba antes ne’e sira la liu hosi kursu jenerál.

“Ne’e hanesan dezafiu boot ba ami na’in haat iha futuru. Maibé, ami prontu enfrenta tanba ida ne’e papél ida atu kontribui ba dezenvolvimentu nasaun no Estadu,” Falur informa.

Brigadeiru Jenerál na’in haat sei asumi serbisu iha área Komponente Naval, Terrestre, Komponente Apoiu Serbisu, no Komponente Formasaun no Terrenu. Kna’ar hirak ne’e seidauk atribui ba brigadeiru jenerál ida-idak tanba sei iha prosesu deskusaun no preparasaun.

Partisipa iha seremónia promosaun ne’e maka hanesan Prezidente Parlamentu Nasionál, Aniceto Lopez Guterres, Prezidente Tribunál Rekursu, Deolindo dos Santos, Primeiru Ministru, Marí Alkatiri, eis Prezidente PN, Vicente Guterres, membru PN sira, membru Governu sira, veteranu sira, família ofisiais F-FDTL no konvida sira seluk tan.


Jornalista: Xisto Freitas | Editór: Manuel Pinto

Imajen: Superiores F-FDTL ne’ebé simu promosaun maka hanesan Koronél Domingos Raul "Falur Rate Laek" promovidu ho Dekretu Prezidente Repúblika nú. 14/2018/30 Maiu, Koronél Américo Ximenes "Sabica Bessi Kulit" promovidu ho Dekretu Prezidente Repúblika nú. 15/2018/30 Maiu, Koronél Cornélio Ximenes "Maunana" promovidu ho Dekretu Prezidente Repúblika nú. 16/2018/30 Maiu no Koronél João Miranda "Aluc Descartes" promovidu ho Dekretu Prezidente Repúblika nú. 17/2018/30 Maiu.
PARTILHAR

Author: verified_user

Publicação luso-timorense sem fins lucrativos

0 comentários: