sexta-feira, 8 de junho de 2018

Akadémiku sei diskuti iha Londres influénsia istóriku portugeza iha nível global


Influénsia portugeza iha lian, múzika, literatura hosi nasaun sira iha Amérika-Súl, Ázia ho Áfrika, ne'ebé dura sékulu barak nia laran, hanesan tema hosi konferénsia ida iha loron-segunda, iha Londres, ho akadémiku sira hosi universidade britániku oioin.

Prezensa hosi lian portugeza iha Brazil, Angola, Mosambike, Guiné-Bissau, São Tomé & Prínsipe, Cabo Verde, Makau ho Timor-Leste hanesan baibain atribui ba tempu ne'ebé maka teritóriu sira ne'e halo parte iha administrasaun luzitanu maibé influénsia ne'e alastra ba parte kultural.

Kestaun ida ne'ebé maka organizador sira hosi Fakuldade Estudu Avansadu sira hosi Universidade Londres nian hein hodi hatán maka "oinsá nasaun ida konsege ho rekursu sira limitadu husik marka ida ne'ebé konsege moris beibeik hasoru poténsia imperial sira ne'ebé maka mosu hafoin ne'e?".

Organizadora ida, Shihan da Silva, afirma ona ba ajénsia Lusa katak "influénsia portugeza ne'e dura ona liuhosi tempu sira, tanba [ema portugés sira] aprende [informasaun] no halo interasaun ho ema sira ne'ebé sira iha kontaktu, iha parte seluk mundu nian".

Autora hosi serbisu sira ho livru sira kona-ba prezensa portugeza iha Ázia, liuliu iha Oseanu Índiku, investigadora garanti katak ohin loron iha elementu linguístiku sira hosi portugés iha idioma aziátiku hamutuk 50 resin.

Tema sira hosi painel sira sei ko'alia "relevánsia hosi diáspora afrikanu transnasional sira ba kestaun lian ho kultura nian", "kreolizasaun ho diáspora iha Índia Portugeza sira" ho "hibridizmu ho kreolizasaun iha múzika ho lian hafoin kolónia sira iha Oseanu Índiku".

Dalan oinsá ema portugés sira konsege ona hakbesik ba povu sira ne'ebé la hanesan ne'ebé sira vizita ona no koloniza ona sei analiza hosi espesialista sira hosi universidade sira Londres, Bristol ho Swansea.

SAPO TL ho Lusa

Sem comentários: