sexta-feira, 8 de junho de 2018

Violénsia Doméstika Impede Partisipasaun Feto

PARTILHAR

DILI, (TATOLI) - Sekretáriu Estadu Igualdade Jéneru no Inkluzaun Sosiál, Laura Menezes Lopes, observa katak kauza no abut ne’ebé impede feto ninia partisipasaun mak problema violénsia doméstika hasoru feto tanba tenke fó solusaun konaba problema hirak ne’e.

“Governu kontinua koopera nafatin ho parseiru hotu-hotu atu bele hakabit sosiedade no maluk feto sira atu bele fó partisipasaun kualidade ba prosesu dezenvolvimentu nasionál,” Laura Menezes Lopes informa ba jornalista sira iha biban konferénsia ne’ebé realiza iha Auditoria Ministériu Finansa, ohin.

Sekretáriu Estadu Igualdade Jéneru no Inkluzaun Sosiál, hateten konferénsia ne’ebé realiza husi Uniaun Europeia (UE) ho tema “Mulher Forte Nação Forte” importante tanba liuhosi sorumutu ne’e, bele hetan solusaun ba problema feto iha sosiedade.

“Bainhira iha sorumutu hanesan ne’e, ita bele hetan solusaun hodi influensia no sensibiliza ba komunidade atu feto ho mane bele iha respeitu ba malu, liu-liu kuandu iha uma kain ona tenke iha responsabilidade, halo diálogu no buka solusaun ne’ebé pasivu atu ema hotu bele partisipa iha dezenvolvimentu nasionál”, nia dehan tan.

Hodi hein katak informasaun husi panelista sira bele fó reverénsia hodi bele inspira no motiva atu feto maluk sira bele fó kontribuisaun diversifika progresu kontribuisaun ba kualidade dezenvolvimentu nasaun nian.

Entretantu, panelista iha konferénsia ne’e mai husi reprezentante feto husi instituisaun públiku, privada no ajénsia sira husi rai laran no rai li’ur, nune’e mós reprezentante feto husi membru governu, parseiru dezenvolvimentu governu no seluk tan.

Jornalista: Julia Chatarina | Editór: Manuel Pinto

Imajen: Sekretaria Estadu Igualdade Jeneru no Inkluzaun Sosial, Laura Abrantes, iha seminariu konaba partisipasaun feto iha eleisaun antesipada. Foto Antonio Goncalves
PARTILHAR

Author: verified_user

Publicação luso-timorense sem fins lucrativos

0 comentários: