DILI, (TATOLI) - Prezidente
Repúblika, Francisco Guterres, Lú-Olo hato’o rekoñesementu, hodi povu nia
naran, ba eis-primeiru-ministru governu konstitusionál da-hitu, Marí Alkatiri
no membru governu da-hitu sira hotu tan ho maneira transparente, kompetente no
ezemplár oinsá jere nasaun iha sirkunstánsia espesiálmente ezijente.
“Susesu husi governu da-hitu ne’e
atesta husi estabilidade sosiál no jestaun orsamentál rigoroza ne’ebé asegura
durante kuaze tinan ida, alende restrisaun orsamentu ne’ebé forte, impostu husi
sistema duodecimo,” hateten Prezidente Repúblika (PR), Lú-Olo perante públiku,
nasionál no internasionál, iha Palásiu Nobre, Lahane-Díli, sesta lorokra’ik
ne’e.
Xefe estadu mós hato’o parabéns
mós ba povu tanba hatudu maturidade boot no determinasaun hodi mantein pás no
armonia iha ita-nia rain. “Parabéns ba povu no nasaun tanba, hodi ita hodi
manan dezafiu sira iha tinan ikus ne’e, Timor-Leste moris,” dezeja Prezidente
Repúblika.
Ba Primeiru-ministru Taur Matan
Ruak, Prezidente Lú-Olo akresenta katak hanesan xefe estadu, ho obrigasaun hodi
asegura funsionamentu di’ak instituisaun sira nian no respeitu
konstituisaun-ne’ebé estabelese igualdade sidadaun sira nian iha lei nia
oin-Prezidente Repúblika iha obrigasaun konstituisaun hodi ezije governu nia komportamentu
ezemplár no governasaun di’ak: Ida ne’e mak espetativa sidadaun sira nian.
“Sidadaun sira hanesan iha lei
nia oin, la iha diskriminasaun no tenke trata husi governu ho ekidade, tuir
ninia méritu, tantu iha polítika empregu, iha polítika saúde, edukasaun inklui
asesu ba eskola, ba universidade, ba bolsa estudu sira, hanesan mós relasaun
estadu sira ho nia sidadaun sira-iha Díli nó mós iha munisípiu sira,” dehan
xefe estadu.
Jornalista: Rafy Belo | Editór:
Manuel Pinto
Imajen: Prezidente Repúblika,
Francisco Guterres Lú Olo
Sem comentários:
Enviar um comentário