Prezidente timoroan defende ona,
iha loron-sesta ne'e, "toleránsia zero" ba violénsia hasoru feto
sira, apela ba ezekutivu hodi fó prioridade ba polítika sira ne'ebé previni no
fó kastigu ba violénsia doméstika.
"Ita tenki rekuza maka'as,
lahó dúvida, violénsia iha família nia laran no violénsia jéneru nian iha ita
nia nasaun. Ita tenki serbisu hodi muda situasaun ne'e ba nafatin no
lalais", afirma hosi Francisco Guterres Lu-Olo.
"Ha'u apela ba Konsellu
Ministru, ba ajénsia relevante sira Estadu nian hodi fó prioridade ba
implementasaun hosi polítika sira ne'ebé previni no fó kastigu ba violénsia
doméstika. Ba sosiedade tomak, ha'u apela: mai ita rejeita violénsia", nia
insisti.
Lu-Olo, ne'ebé ko'alia iha
konferénsia ida iha Díli, fó hanoin katak Timor-Leste uluk no sei hanesan
"sosiedade ida ne'ebé marka ho violénsia hosi okupasaun" indonéziu,
ne'ebé ohin loron tenki "fó ezemplu", hodi hapara violénsia.
"Ha'u husu ba nasaun ´toleránsia
zero´ ba violénsia doméstika. Família tenki hanesan fatin ida domin no
kompañeirizmu nian no la'ós hanesan fatin ida violénsia nian", nia husu.
Lu-Olo ko'alia iha abertura hosi
konferénsia "Mulheres
fortes para uma nação forte", inisiativu hosi Uniaun Europeia iha
Timor-Leste no ne'ebé partisipa, entre konvidadu sira seluk, kantora Sara
Tavares, líder hosi CDS Portugal nian, Assunção Cristas ho ministra angolana
Ana Paula Carvalho.
Violénsia hasoru feto sira
hanesan problema sosial todan liu iha nasaun, ho estudu sira hatudu prevalénsia
hosi kazu sira no inkapasidade, iha situasaun barak, hosi instituisaun sira,
inklui justisa, hodi hasoru problema ne'e ho di'ak.
Relatóriu ida hosi tinan 2017
hosi Programa Monitorizasaun hosi Sistema Judisial (JSMP) hatudu katak tribunal
timoroan sira ladún trata ho di'ak kazu sira violénsia seksual nian, ho prátika
sira ne'ebé la proteje vítima sira no ne'ebé la liga ka interpreta ladi'ak lei.
Estudu ida seluk, hosi Asia
Foundation, refere ona katak pelumenus 34% hosi feto timoroan sira, entre tinan
15 to'o 49, hanesan vítima hosi violénsia seksual, ho 41% hosi feto sira ne'e
sai vítima hosi parseiru íntimu ida.
Feto na'in ida entre feto na'in
haat (24%) no mane na'in rua entre mane na'in lima (42%) sai hanesan vítima
hosi abuzu seksual antes halo tinan 18 no, iha nível global, ema na'in tolu
entre ema na'in haat iha Timor-Leste sai ona hanesan vítima hosi violénsia ruma
ka abuzu fíziku antes halo tinan 18.
Kuaze metade hosi feto sira no
1/3 hosi mane sira admiti katak hanesan sasin ba inan ne'ebé sai vítima hosi
violénsia fíziku hosi parseiru sira.
Ba públiku timoroan ho
internasional iha konferénsia, Lu-Olo defini ona hanesan prioridade
"aumentu hosi oportunidade sira hosi ezersísiu sidadania nian hosi feto
timoroan sira", aspetu ne'ebé sei hasoru "dezafiu barak", inklui
"hametin respeitu ho rekoñesimentu ne'ebé sosiedade tenki halo ba feto
sira".
"Kapasidade ho
kompeténsia" iha área atividade oioin, hosi partisipante sira iha
konferénsia tenki serve hanesan "fonte korajen nian ba feto sira seluk
ne'ebé hakarak ba no bele iha liu susesu", nia subliña.
Konferénsia "reflete
prioridade hosi diálogu no ba koperasaun Estadu ho sosiedade sivil, iha nível
tomak, ne'ebé maka nasaun tenki fó no aprofunda" hodi hatán ba
"dezafiu boot" ne'ebé maka "hadi'a igualdade oportunidade sira
hosi feto sira no mane sira" iha Timor-Leste, nia hatutan mós.
"Hanesan urjente atu ita
serbisu hamutuk hodi nune'e sosiedade valoriza ho di'ak no ho dalan justu
kontributu importante hosi feto sira. Ha'u fiar katak iha posibilidade reforsa
reprezentasaun hosi feto sira iha órgaun sira Estadu nian no iha sosiedade iha
jeral", nia hatutan.
Xefe Estadu subliña ona katak
"avansu modestu hosi feto timoroan sira" kontinua, iha parte barak,
"kuaze limita nafatin ba sidade boot sira", ho 70% hosi sidadaun feto
sira iha nasaun ne'ebé maka moris ho hela iha meiu rural, "ho asesu ki'ik
ba oportunidade hosi afirmasaun sosial ho pesoal".
"Hanesan ba 70% hosi feto
sira hosi ha'u nia nasaun ne'e, ne'ebé moris iha foho sira, iha kampu sira no
iha natar sira hosi rai doben ne'e, maka ha'u husu reflesaun hosi partisipante
sira iha Konferénsia ne'e no, hosi sira ne'ebé la asisti konferénsia, hosi
órgaun sira Estadu nian", nia hatete.
Entre konvidadu sira seluk, iha
konferénsia ne'e partisipa mós hosi juíza brazileira Sandra Silvestre, juíza
konselleira hosi Tribunal Rekursu timoroan, Natércia Gusmão, ministru justisa timoroan,
Ângela Carrascalão ho visi-ministra Edukasaun timoroan nian, Lurdes Bessa.
Konferénsia hanesan eventu ida
hosi eventu oioin kona-ba knaar feto nian ne'ebé maka promove iha fulan-Juñu
hosi Uniaun Europeia iha Timor-Leste.
Ho tema "Mulheres fortes
para uma nação forte", eventu sira inklui konferénsia ida ho konsertu
gratuitu ida iha Sentru Konvensaun Díli nian, ne'ebé sei atua Sara Tavares,
artista timoroan Cidália Brites ho DJ Merche Romero.
SAPO TL ho Lusa
Sem comentários:
Enviar um comentário