Líder norte-koreanu karik sei hetan eskolta hosi aviaun sira kombate xinés nian to'o Singapura

Xina karik sei haruka aviaun sira kombate nian hodi eskolta líder norte-koreanu, iha viajen ba Singapura, ne'ebé sei hasoru malu ho Prezidente norte-amerikanu, iha semana oinmai, notísia ne'ebé fó sai hosi jornal ida hosi Hong Kong.

Tuir South China Morning Post, ne'ebé haktuir fonte militar hosi Koreia-Súl, "eskolta [xefe Estadu ida] ho aviaun sira hanesan protokolu ida seguransa nian ne'ebé aas tebes ne'ebé maka forsa aérea ida bele oferese", hodi halo ilustrasaun ba reaproximasaun entre Pekin ho Pyongyang.

"Bainhira Xina oferese eskolta, bele hanesan mensajen diretu ida ba aliansa entre EUA ho Koreia-Súl katak Xina apoia maka'as rejimi hosi Kim Jong-un", afirma hosi fonte hanesan.

Seidauk hatene detalle sira hosi dalan ne'ebé maka Kim sei halo, entre Pyongyang ho Singapura, ho distánsia besik kilómetru 4.000, maibé Kim tenki hili medida seguransa sira ne'ebé maka'as durante deslokasaun.

Tuir Lee Yon-keol, membru antigu hosi grupu ne'ebé garanti seguransa hosi família Kim nian, no ne'ebé halai ba Koreia-Súl, karik líder norte-koreanu atravesa fatin aéreu xinés, "hodi garanti nia seguransa, nune'e sei iha protesaun hosi Xina".

Deslokasaun koñesidu dahuluk hosi Kim ho aviaun ba estranjeiru, nu'udar líder nasaun nian, akontese iha inísiu fulan liubá, bainhira semo to'o sidade xineza Dalian, kilómetru 360 hosi Pyongyang, hodi hasoru malu ho Prezidente xinés, Xi Jinping.

Viajen ne'e konsidera ona hanesan ensaiu ida ba simeira ho Donald Trump, tanba antes líder norte-koreanu halo viajen nafatin ho komboiu.

Sei hala'o nafatin preparativu sira ba reuniaun entre Trump ho Kim.

Iha loron-kinta, ministru Negósiu Estranjeiru Singapura nian, Vivian Balakrishnan, halo ona viajen to'o Pyongyang hodi ko'alia detalle sira enkontru nian ho nia homólogu norte-koreanu, Ri Yong-ho.

Simeira iha loron 12 Juñu sei hanesan simeira dahuluk entre líder importante sira hosi EUA ho Koreia-Norte, hafoin konfrontu kuaze tinan 70 nia laran, no akontese hafoin iha tinan liubá tensaun sira to'o nível inéditu ida no hosi misil balístiku sira hosi Pyongyang no ba liafuan funu sira hosi Donald Trump nian.

SAPO TL ho Lusa