DILI, (TATOLI) — Prokuradór
Jerál Repúblika (PJR), José da Costa Ximenes, lamenta ho deklarasaun hosi
Provedór Direitus Umanus no Justisa, Silveiro Pinto Baptista, ne’ebé akuza
funsionáriu Ministériu Solidariedade Sosiál (MSS), Ministériu Obras Públikas no
Ministériu Públiku (MP) partisipa iha kampaña eleitorál iha 18 abril 2018
liu-ba.
Ximenes hateten nia hato’o tiha
ona protesta formál ida ba Provedoria Direitus Umanus no Justisa (PDHJ-sigla
portugés) kona-ba atidude ne’e.
“Ha’u lakohi ko’alia kona-ba MSS
no Obras Públikas ninian maibé funsionáriu MP laiha ema ida partisipa kampaña
eleitorál. Deklarasaun ne’ebé Provedór hato’o ne’e la loos tanba to’o ohin
loron ami seidauk simu relatóriu ida katak funsionáriu MP partisipa iha
kampaña”, nia dehan kestaun ne’e ba jornalista sira iha Palásiu Prezidente
Nicolau Lobato, Bairru Pité, semana ne’e.
Prokuradór Jerál informa to’o
ohin loron PDHJ la aprezenta provas. “Ita nia problema maka fó uluk deklarasaun
maibé to’o ohin loron ami la simu relatóriu kona-ba akuzasaun ne’e”, nia
hatutan.
Ximenes esklarese Ministériu
Públiku iha rejime oi-oin maka hanesan funsionáriu públiku (serbisu apoiu
tékniku administrativu), ofisiál justisa no majistradu sira, tan ne’e, nia
hakarak hatene sé loos maka tuir kampaña.
“Instituisaun Estadu sira divia
informa faktu loloos ba malu para karik iha duni funsionáriu balun involve
kampaña, entaun buka posibilidade atu rezolve duké akuza malu fali”, Prokuradór
Jerál tenik.
Jornalista: Xisto Freitas | Editora:
Rita Almeida
Imajen: Prokuradór Jerál
Repúblika, José da Costa Ximenes.
Sem comentários:
Enviar um comentário