Governu Ho Igreja Diskute Impaktu Ambientál Ne’ebé Hamosu Husi Vizitante Ramelau

DILI, (TATOLI) – Ministériu Turizmu (MT) hamutuk ho ministériu relevante no Igreja hala’o enkontru alargada relasiona ho problema lixu no kestaun sosiál ne’ebé prodús hosi vizitante foho Ramelau.

Diretór Jerál MT, José Dias Quintas, hatete iha tempu badak ministériu relevante no parte interesada tenke buka solusaun no MT haree katak importante tende estabelese grupu traballu urjente para responde ba ida ne’e tanba loron bá loron vizitante sa’e.

“Entaun oinsá mak minimiza nia impaktu ida ne’e presiza kolaborasaun husi parte hotu para tau ideia hodi buka solusaun bá oin para prezerva nafatin fatin ne’e hanesan fatin sagrada”, Quintas dehan iha Sentru Konvensaun Dili, ohin.

Iha sorumutuk ne’e Diretór Jerál afirma Ramelau dezignadu hanesan área protejida, maibé problema akontese maka lixu mosu barak tanba jestaun laiha.

“Realidade problema ne’e mosu no sai hanesan estudu kazu ida ba ita para ministériu relevante ho parseiru tau lesuk hanoin hodi bele rezolve ida ne’e”.

Ho kestaun ne’ebe akontese maka liuhusi enkontru ne’e atu forma ekipa serbisu ne’ebé kompostu husi ministériu relevante, igreja, Organizasaun Naun Governamentál ne’ebé envolve iha hadomi ambiente para solusiona liuliu ba lixu no komportamentu joven sira-nian.

Nune’e husi prespetiva MT nia solusaun ne’ebé maka atu diskute hamutuk mak tende imediata buka solusaun ba jestaun nian aleinde ne’e infraestrutura, rekursu umanu no promosaun.

“Imidiata signifika domingu ida ka rua ita tenke rezolve ona jestaun, agora kona-ba infraestrutura hein lai tanba situasaun, ne’e ita ko’alia kona-ba osan prosesu sei naruk, maibé ita-nia parseiru dezenolvimentu USAID prontu para atu apoia, depois rekursu umanu ita mós sei presiza tempu kurtu, médiu prazu tanba ita mós tenke fó koñesimentu kle’an ba ema sira hein fatin ne’ebá, entermu konservasaun, oinsá mak simu ema ho di’ak ne’e ita presiza fó abilidade ba sira no promosaun orsida infraestrutura kuandu di’ak hotu ita komesa promove”.

Sobre solusaun ne’ebé atu foti lalais mak jestaun liga ba lixu, oinsá muda ema nia komportamentu para labele estraga sasán, kontrola kapasidade karga nian, estasionamentu, regra, kontribuisaun no infraestrutura bázika.

Ministru Turizmu, Manuel Vong, katak turizmu relijiozu ne’e fatin ne’ebé mak sagradu atu halo devosaun no kontemplasaun ba ita-nia fiar.

“Kestaun mak oinsá ita bele jere fatin ne’e ho di’ak nomós vizitante ne’ebé bá ne’e atubele kumpri regra ne’ebé iha no ita kontente númeru vizitante komesa bá liuliu ho inisitaiva rasik ne’e sinál ida di’ak tebes, kestaun mak oinsá ita bele toma atensaun para fó asisténsia ida ba vizitante”.

Jornalista: Maria Auxiliadora | Editora: Rita Almeida

Imajen: Na'i Feto Ramelau. Foto/Google.