Falsifika dokumentu, PNTL detein suspeitu Xineza

Suspeitu Xineza Yan Sui Long ba kazu taxi ilegal detein iha sela Polísia Munisípiu Díli, tanba falsifikasaun dokumentu operasional  ba  nia kareta hodi tula pasajeiru.

Enkuantu kareta ne’ebé uza hanesan taxi  entrega ona ba Ministériu Públiku Munisípiu Díli. Tamba Taxi ilegal ne’e kondus rasik husi suspeitu hodi buka pasajeiru iha Díli laran.

Segundu Komandante Polísia Munisípiu Díli Superintendente Asistente Euclides Belo, informa, suspeitu ba kazu taxi ne’ebé laiha lisensa operasionál  detein iha sela Polísia Munisípiu Díli hodi kumpri oras hitu nolu resin rua  molok submete ba primeiru interogatóriu iha tribunal distritál Díli.

“Suspeitu   ne´ebé mak modifika kareta taxi online   ne´ebé mak   iha loron  hirak  liu ba funsionariu Diresaun Nasionál Transporte  Terrestere  (DNTT)  ne´ebé mak identifika, depois koordena ho parte Polísia konsege kaptura  suspeitu ho naran Yan Sui Long.  Ita kaptura   suspeitu tanba hatudu katak nia komete duni iha falsifikasaun dokumentus  operasional   kareta nian depois hodi tula pasajeirus. Suspeitu ne´e agora ita detein ona  iha sela detensaun PNTL Díli hodi submete ba  primeiru interogatoriu,” Segundu Komandante Polísia Munisípiu Díli Superintendente Asistente Euclides Belo, ba  GMN Kuarta (12/09/18), iha edifisiu CNE,  Caicoli,  Díli.

Alende ne’e Diretór Kompañia Divita Group nu’udar na’in ba Taxi Argo, Fernando da Silva, agradese ba PNTL ho DNTT,  ne’ebé konsege kaer toman suspeitu  hodi submete ba prosesu investigasaun. Tanba tuir nia ho aktu sidadaun Xineza ne’e  fó impaktu ba ninia Taxi Argo  ho mós taxi sira seluk.

“Taxi  ilegal  ne´e ami identifika  kleur  tiha ona, no ami hatene katak   kareta  ne´e hala’o operasional  ilegal  tanba laiha dokumentu   operasional no kareta ne´e uza sapa matríkula privadu  A 15-783 TL. Uluk kedas ami hato´o ba parte DNTT  tanba  ne´e mak agora dadauk autoridade seguransa ho DNTT kaptura suspeitu  ne´e. Ami  totalmente la aseita i la konkorda ema estranzeiru  ne´ebé mak mai iha ne´e halo bisnis mas uza meus  ilegal.  Tanba  ita haree   Taxi kinur barak los termasuk ami nia taxi trans, dala ruma loron ida ami la hetan buat ida,” dehan Fernando da Silva.

Entretantu Sidadaun Xineza ne’e hapara iha área Balide, Segunda feira loron 10, fulan Setembru, tinan ne’e, wainhira tula pasajeiru ne’ebé udar funsionáriu DNTT nian, husi Timor Plaza Comoro nian mai iha DNTT Balide. nax

GMN TV | Grupo Média Nacional