Loron Ualu Hahú Prosesu Formasaun Komisaun Inkéritu

DILI, (TATOLI) - Rekerimentu Komisaun Inkéritu Parlamentár sei iha meza Parlamentu Nasionál no tuir lei Komisaun Inkéritu Parlamentár, Prezidente Parlamentu Nasionál iha loron ualu (8) konta hosi loron ne’ebé propoin komisaun refere, sei hahú prosesu ba formasaun Komisaun Inkéritu ninian.

Xefe bankada FRETILIN iha Parlamentu Nasionál, Aniceto Guterres, hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, sesta ne’e, hafoin hala’o enkontru ho Xefe Estadu, Francisco Guterres Lú Olo.

Nia dehan Komisaun Inkéritu ne’e forma liuhusi rezolusaun Parlamentu Nasionál depois konsulta mós ho konferénsia líder bankada parlamentár.

Aniceto esplika komisaun ida ne’e  ho nia prosesu atu haree projetu sira ne’e nia legalidade, ezisténsia projetu no kualidade.

Eis Prezidente Parlamentu ne’e subliña katak bainhira  prosesu inkéritu ba projetu la’o hela maibé hahú pagamentu dadaun, enkuantu rezultadu ne’e hatudu projetu ne’ebé hetan pagamentu ne’e ilegál, ne’e responsabilidade seluk fali ona tanba relatóriu Komisaun Inkéritu ninian bainhira iha indisius krime ruma sei enkamiña ba Ministériu Públiku para halo efetivasaun responsabilidade kriminál.

Jornalista: Xisto Freitas | Editór: Manuel Pinto

Imajen: Xefe bankada FRETILIN, Aniceto Guterres