Ministru Fídelis Magalhaẽs Sai Asionista Ba BNCTL

DILI, (TATOLI) – Governu daulau nomea Ministru Reforma Lejislativa no Asuntu Parlamentár, (MRLAP), Fídelis Leite Magalhaẽs, sai asionista Estadu ba Banku Nasionál Komérsiu Timor-Leste (BNCTL-sigla portugés) durante Governasaun Taur Matan Ruak.

Prezidente Konsellu Administrasaun BNCTL, Brigido de Sousa, hateten Ministériu Ekonomia no Dezenvolvimentu no  Ministériu  Finansa maka nomea govenante ne’e.

ʺAsionista ne’e reprezenta Estadu iha BNCTL, hodi haree osan ne’ebé governu rai hodi jere tuir lalaok banku nian ka la’eʺ, afirma nia ba jornalista sira hafoin sorumutu ho ministru Fídelis iha Palásiu Governu, ohin.

Funsaun seluk maka ajuda BNCTL hodi implementa politíka fó kréditu barak ba kliente, asesu finanseira ba komunidade hodi halo negósiu no seluk tan ba apoiu prosesu dezenvolvimentu.

Brigido dehan asionista estadu ne’e husu hametin koordenasaun servisu entre BNCTL no Governu iha futuru.

ʺMinistru fó garantia hanesan Estadu ba BNCTL hanesan banku uniku Estadu nian atu dezenvolve di’ak liután ba oinʺ, realsa.

BNCTL Kontinua Fó Kréditu

Ba jornalista sira, Brigido de Sousa mós haktuir BNCTL kontinua oferese kredítu ba kliente sira. ʺKréditu ki’ik ba negósiu no funsiónariu públiku la’o helaʺ.

Nia dehan banku simu proposta barak, maibé sei fó fazeadamente. ʺAgora ami trava uitoan, tanba tinan uluk ami fó kréditu barak liu, proposta ne’ebé ami simu barak tebes ho nune’e ami sei fó fazeadamente, sira ne’ebé hatama proposta uluk ami fó ulukʺ, afirma.

Brigido rejeita informasaun ne’ebé espalla iha públiku katak BNCTL la atende kréditu ba kliente.

Ho problema orsamentu, BNCTL husu ba Governu aumenta kapitál hodi apoiu dezenvolvimentu.

ʺBanku Estadu presiza kapitál forte, tanba se kapital forte banku sei fó kréditu barak liu, montante boot no iha lekides forteʺ, akresenta.

Governu investe ona milliaun $25 ba BNCTL, maibé to’o tinan kotuk banku konsege fó fila reseita ba Estadu milliaun $15.

BNCTL konsege fó ona kréditu ba kliente kuaze rihun sanulu resin hitu ho orsamentu milliaun $78.

Jornalista: Agapito dos Santos | Editora: Rita Almeida

Imajen: Prezidente Konsellu Administrasaun BNCTL, Brigido de Sousa, ho ekipa, ohin sorumutu ho Ministru Reforma Lejislativa no Asuntu Parlamentár, (MRLAP), Fídelis Leite Magalhaẽs, iha Palásiu Governu. Imajen Egas Cristovao