SERVE Husu Onestidade Individuál Fa’an Ai-Moruk Herbal Atu Rejistu

DILI, (TATOLI) – Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, hatete fa’an ai-moruk herbal ho individualmente konsidera hanesan atividade ekonómika ida no lei fó dalan, maibé atu halo negósiu ida ne’e presiza rejista iha SERVE.

Tanba ne’e husu onestidade individuál ne’ebé halo atividade ne’e atu halo rejistu, nune’e bele hetan sertifikadu.

“Indivíduu ne’e lei fó dalan, uluk liu antes 2012 labele, tanba tenke sai tiha kompañia tanba ne’e iha tinan lima ba kotuk ita iha dekretu lei foun ne’ebé fó dalan ba indivíduu sira ne’ebé hakarak halo negósiu atu hetan buat ida naran ENIN, empresa em nome individuál”, Florêncio afirma iha edifísiu Alfándega (eis Ministériu Finansa), ohin.

Bainhira ema ida ne’ebé fa’an mak larejista sei hetan koima dólar 500 no ba empreza maka sei kona dólar 5000.

“Duké imi kona dólar 500 ne’ebé aplika ba imi di’ak liu mai SERVE para rejista gratuita, hetan suratahan ida kapa’as”, katak.

Diretór ne’e akresenta SERVE tuir hela vendedór sira ne’e la’ós atu hamate negósiu, maibé  bazea ba lei, nune’e labele kona pena ida ne’e.

“Maibé ita-boot lakohi rejista depois halo (negósiu) nafatin ida ne’e mak sei kona. Ita lakohi hanorin ema atu hetan kulpa depois atu fó koima ba sira, ita hakarak hanorin ema para tuir”.

Tanba ne’e SERVE deteta hela ema sira ne’ebé halo negósiu ne’e, maibé fatin mak lahatene, nune’e husu ba fa’an-na’in sira atu kumpri lei.

Hatutan bainhira ema ida tama iha atividade ida ne’e, entaun presiza regula tuir lei sosiedade komersiál no dekretu lei rejistu komersiál para hetan de’it sira-nia entidade legál hafoin ne’e bele ou labele ai-moruk ne’e bele utiliza iha komunidade no iha lei ida mak regula no ida ne’e iha ona kompeténsia Ministériu Saúde nian.

“Entaun saida mak Ministériu Saúde no SERVE halo durante ne’e, dezde sira hatama sira-nia pedidu sai entidade ida ba ai-moruk herbal ida ne’e, ami enkamiña kedan ba Ministériu Saúde no sei filafali mai SERVE durante loron sanulu no hatete bele ka la’e atu hasai sertidaun sertifikadu”.

“Ida ne’e halo hela daudaun. Iha fulan kotuk husi parte SERVE ho Ministériu Saúde no Ministériu Komérsiu deside loloos atu ai-moruk herbal ida ne’e bele ou labele no dezde konsidera hanesan atividade ekonomika sempre bele, se bele ona ita regula, tanba Ministériu Saúde esplika katak iha dekretu lei ida ne’ebé regula ida ne’e, maibé simplesmente labele fó, sira sei fó rekomendasaun ba SERVE atu fó sertifikadu autorizasaun, maibé depois sira bá halo lai sira-nia knaar atu nune’e hetan lai lisensa operasionál bele ou labele”.

Jornalista: Maria Auxiliadora | Editora: Rita Almeida