DILI, (TATOLI) – Governu
Japaun no Fundu Nasaun Unida ba Labarik (UNICEF-sigla inglés) asina troka
nota atu fortalese sistema rejistu moris universál iha Timor-Leste (TL).
Iha projetu ne’e governu Japaun
sei oferese Yen Japaun millaun 273 (maizumenus dolár milliaun 2,5) ba tinan
tolu hodi estabelese sistema rejistu moris ida forte iha país ne’e.
“Projetu ne’e ninia objetivu mak
aumenta taxa rejistu nasimentu labarik sira ho idade tinan lima ba kraik ho
pursentu 80” ,
dehan embaixadór Japaun, Hiroshi Minami, liuhusi diskursu, iha Kampaun Nasaun
Unida Kaikoli, ohin.
Embaixadór ne’e akresenta projetu
ne’e inklui komponente oioin hanesan atividade advokasia husi governu,
kapasitasaun iha área lokál, atividade sensibilizasaun iha komunidade lokál no
empoderamente ba família no labarik sira.
“Objetivu fundamentál husi
projetu ne’e mak hadi’a situasaun direitu umanu labarik sira nian iha
Timor-Leste liuhusi estabelesimentu sistema rejistu nasimentu universál ida
ne’ebé robustu (forte-red)”, dehan diplomata japonés ne’e.
Nia dehan tan governu Japaun iha
área prioritáriu tolu iha nia polítika ba Timor-Leste, no projetu ne’e aliña ho
área prioritáriu sira ne’e, hadi’a servisu sosiál bázika.
Projetu ne’e diretamente ligadu
ho meta Objetivu Dezenvolvimentu Sustentável 16 Organizasaun Nasaun Unida (ONU)
nian, sosiedade pasífika, meta ida ne’ebé ninia alvu atu fornese identidade
legal ba ema hotu, inklui rejistu nasimentu até 2030.
Espera katak projetu ne’e sei
kontribui ba hadi’a edukasaun, objetivu haat no nutrisaun, meta rua.
Alende ne’e projotu ne’e sei iha impaktu signifikativu ba Kobertura Universál
Saúde.
Kobertura Universál Saúde mak
vizaun ida kuidadu saúde nian ne’ebé mak governu Japaun halo ona advokasia.
“Ami fiar katak projetu ne’e sei iha impaktu pozitivu ba setór barak, tanba
ne’e mak projetu ne’e presiza koordenasaun multisetoriál”, dehan Hiroshi Minami.
Iha fatin hanesan, reprezentante
UNICEF TL, Valerie Taton espresa, apresia governu Japaun nia apoiu ba
Dezenvolvimentu Sistema Rejistu Moris Universál Timor-Leste.
Nia rekoñese iha Timor-Leste halo
ona progresu signifikante hahú ratifika Konvensaun ONU kona-ba direitu labarik
iha 2003. Labarik barak liutan mak tama eskola no hetan asesu ba kuidadu saúde
primária di’ak, liliu inklui melloramentu bee moos no saneamentu.
Maske nune’e, tuir reprezentante
UNICEF, Valerie Taton, sei iha dezafiu espesialmente iha faze dahuluk labarik
nia moris.
Tuir dadus Avaliasaun Demográfiku
Saúde (2016) hatudu taxa mortalidade tinan lima mai karaik tuun konstante.
Maibé taxa mortalidade infantil ka labarik tinan ida mai karaik nia mate sei
aas.
Defaktu, mortalidade labarik
tinan lima mai karaik porsentu 73 akontese tinan ida mai karaik.
Ne’e hatudu importánsia atu tau
atensaun ba labarik idaidak nia moris no aselera ita-nia esforsu, nune’e
labarik liután sei moris liu tinan lima no kompleta sira-nia potensialidade
durante idade adultu.
Tanba razaun ne’e, rejistu moris
mak pasaporte ba labarik nia moris tuir sira-nia jornada moris ho dignidade.
Hanesan rejistu moris iha efeitu multiplikadór ba setór barak, koordenasaun
intersektoriál presiza tebes atu atinje rejistu moris universál.
Fundu sira husi governu Japaun
sei permite abordajen multi-setoriál no koordenasaun ministeriál iha Ministériu
Justisa nia okos. Atividade xave sira inklui intervensaun sira ba polítika
advokasia ba harii kapasidade lokál, konsentizasaun komunitária, mós
fortalesimentu labarik sira no sira-nia família.
UNICEF Timor-Leste komprometidu
servisu besik liután ho parte interesadu sira, liña ministeriál, parseiru
dezenvolvimentu no sosiedade sívil inklui labarik sira no foinsa’e sira ba
rejistu moris universal.
“Ita-nia esforsu konjunta sira
sei kontribui ba ODS 16-pás, justisa no fortalesimentu instituisaun, no halo
kompromisu seluk ba labarik sira iha Timor-Leste. Mai ita kaer liman hamutuk ba
labarik sira iha Timor-Leste. Ita idaidak iha papel úniku no signifikante atu
halo tuir ita-nia objetivu komun”, Valerie Taton akresenta.
Enkuantu, Governu TL reprezenta
Sekretáriu Estadu Komunikasaun Sosiál, Merício Juvinal dos Reis Akara, hafoin
partisipa no asiste direta serimónia ne’e, ba jornalista katak la diskrimina
ema ida iha ita-nia rain. Sertifikadu hanesan meius ida.
Iha nia diskursu, Merício Akara
hato’o obrigadu no apresiasaun ba governu Japaun no UNICEF ba sira-nia
jenerosidade hodi apoiu inisiativa importante ne’e.
“Ha’u fiar katak projetu
Dezenvolve Sistema Rejistu Nasimentu ba Labarik Sira no Boa Governasaun iha
Timor-Leste bele kria sustantabilidade sistema ne’ebé robustu (forte) ba
Nasaun”, dehan Akara.
Entretantu, partisipa asina ne’e
reprezente Ministériu Finansa (MF), Ministériu Saúde (MS), akadémiku sira husi
Universidade Nasionál Timor Lorosa’e (UNTL), sosiedade sívil no entidade
relevante sira seluk.
Jornalista: Rafy Belo | Editora:
Rita Almeida
Imajen: Asina troka nota
fortalese sistema rejistu moris iha TL entre Japaun ho UNICEF. Foto TATOLI:
Egas Cristovão
Sem comentários:
Enviar um comentário