Parlamentu timoroan nega autorizasaun vizita Prezidente nian ba Santa Sé

Parlamentu Nasional timoroan xumba iha loron-segunda ne'e deslokasaun Prezidente Republika nian, Francisco Guterres Lu-Olo, ba Vatikanu, tanba "situasaun nasaun nian, ida ne'e xumbu ba dala hat viajen xefe Estadu nian ba rai liur.

Deputadu sira barak hosi Frente Revolucionária de Timor-Leste Independente (Fretilin), iha opozisaun, kritika xumbu konabá deslokasaun Francisco Guterres Lu-Olo nian ba rai liur, David Ximenes kestiona saida maka defini hanesan "tirania maioria nian".

Bainhira parlamentu xumba deslokasaun sira ne'e, mensajen saida maka haruka ba komunidade internasional", nia kestiona.

"Nem sempre maioria dehan buat ne'ebé los. Sai hanesan tirania maioria nian envezde insetiva demokrasia boot", hatete.

Francisco Branco, ne'ebé mós hosi Fretilin, hatete katak bankada sira Governu nian labele "konfundi kestaun intern sira ho aspetu diplomasia esterna Estadu nian".

"Ita kahur fali kestaun esterna ho problema internu sira. Ida ne'e iha relasaun ho diplomasia esterna Estadu nian. Ida ne'e hanesan desizaun Estadu nian", konsidera.

António Conceição, hosi Partidu Demokratiku (PD) mós defende importansia vizita ne'e, no destaka "relasaun espesial" ne'ebé maka Timor-Leste mantein ho Vatikanu.

Duarte Nunes, hosi Congresso Nacional da Reconstrução Timorense (CNRT), iha Governu, defende ba adiamentu votu foun ida, no defende katak sei iha tempu sufisiente ba votasaun ba semana oin.

Deputadu ne'e protesta mós kritika sira opozisaun nian, no adianta mós katak reprezentante sira Vatikanu nian iha Timor-Leste "hatene saida maka pasa iha nasaun ne'e" no tanba ne'e sira hantene tanba sá ba desizaun ne'e.

Carmelita Moniz, hosi CNRT mós defende adiamentu ne'e hodi "hare se lider sira rezolve impase politiku ne'e antes prezidente sai hosi nasuan".

Prezidente Parlamentu, Arão Noé Amaral mensiona votasaun ne'ebé maka obteve votu kontra 35 ba autorizasaun no a favor 26.

Francisco Guterres Lu-Olo ne'e solisita deslokasaun ida entre loron 17 no 26 Novembru ba Vatikanu, konvite hosi Papa Francisco.

Pedidu ba autorizasaun ne'e enviadu hosi xefe Estadu, hanesan saida maka lei ejiji, entre pedidu oioin deslokasaun ba rai liur ne'ebé mk pretende halo iha trimestre ikus tinan ne'e nian.

Parlamentu xumba tiha ona, iha fulan Outubru, vizita ba Indonezia no iha fulan Setembru pedidu autoriza Prezidente Republika nian ba vizita Nova Iorke hodi partisipa iha Asembleia-Jeral ONU nian.

Iha fulan Jullu, parlamentu xumba tiha ona pedidu autorizasaun vizita Prezidente nian ba Portugal.

Bankada sira Governu nian kontinua kontesta impase ne'e tanba nomeasaun membru sira balun Governu nian ne'ebé maka primeiru-ministru indijita no ne'ebé maka xefe Estadu seidauk fó pose, balun tanba iha prosesu iha justisa no seluk tanba iha "perfil étiku ida ne'ebé kontroversu".

SAPO TL ho Lusa