Tilman Hau Sai Defeza Ba Kazu Barak, Desizaun La Justu, Halo Rekursu

Dili - Advogadu ida idak estabelese ho sira nia funsaun rasik, atu fo asistensia ba kliente sira neebe presija. Tanba nee Advogadu Tilman mos, halao nia knar, hodi fo aistensia ba kliente sira nee husu nia apoiu, ba iha kazu neebe sira hasoru.

"Hau sai hanesan defeza ba iha krime barak loos, sai mos defeza ba kazu Maut Moruk nian, iha mos krime seluk ofensa corporais, violensia domestika”, dehan Advogadu Privadu Manuel Tilman ba STL iha TDD Segunda, (14/01/2019).

Nia hatutan, husi kazu sira neebe nia sai defeza nee, bainhira la iha desizaun balu neebe justu, sira mos buka meius atu rekore.

Hanesan foin dadaun nee, halo rekursu extraordinariu ba labarik ida neebe, komete krime ofensa contra moral publika, tuir akuzasaun arguidu nee, haksoi liu moru maka tama ba iha uma, maibe arguidu nee la halo hanesan nee.

Nunee mos, arguidu mos foin hetan akuzasaun primeru, maibe tribunal julga no aplika kedan tinan hitu iha prizaun, tanba nee sira nia parte hanesan defeza, sei halo rekursu.

Iha fatin ketak, akademika UNTL Mario Noronha hateten, knar advogadu nian, sai hanesan parte importante ida, atu bele apoiu ema neebe komete iha krime.

Tuir observasaun STL nian katak, Advogadu Manuel Tilman mos iha nia eskritorio rasik, hamutuk ho nia advogadu ida. No sira mos sai defeza ba iha kazu barak, neebe julga iha TDD.

Tanba nee hare katak, advogadu Tilman iha ema barak maka uja nian, sai hanesan sira nia defeza, ba kazu neebe julga iha tribunal, tanba hare ba iha kapasidade, hanesan mos jurista no ema konhesidu ida.

Iha fatin ketak, co-fundador IJTL Paulo Silva Remedios hateten, sira nia asosiasaun estabelese laos atu sai defeza ba iha arguidu sira, maibe atu fo deit protesaun ba iha feto no labarik, neebe hasoru violensia domestika.

Nia hatutan, husi protesaun nee iha atividade rua maka sira halao,  fo apoiu diretu ba iha vitima, iha Polisia Tribunal Hospital Pradet, no akompana ba iha Ministeriu Publiku. 

Notisia kompletu lee iha jornal STL edisaun Kuarta (16-01-2019)

Terezinha De Deus | Suara Timor Lorosae