Dezenvolve Projetu Lei Anti Korrupsaun, PN Hetan Tulun hosi EUA

DILI (TATOLI) –Prezidente Komisaun A Parlamentu Nasionál (PN) ne’ebé trata asuntu Konstitusionál no Justisa, Carmelita Moniz, informa;  projetu lei anti korrupsaun iha ona faze dezenvolvimentu, ba prosesu ida ne’e, PN liu-liu komisaun A hetan tulun hosi  Asesór Legál Estadus Unidus Amerika (EUA), David Paul Lewen.

“David Paul Lewen, sei mai servisu hamutuk ho Komisaun A hodi dezenvolve Projetu Lei Anti Korrupsaun. Di’ak tebes atu Komisaun A Parlamentu Nasionál servisu hamutuk,” Deputada Carmelita Caetano Moniz ba jornalista sira hafoin hasoru malu ho Embaixadora EUA, Kathleen M. Fitzpatrick ho Asesór Legál, David Paul Lewen, PN, ohin.

Nia hatutan David Paul Lewen ho Embaixadora Kathleen M. Fitzpatrick, ohin vizita ba PN atu haree projetu Lei Anti Korrupsaun nune’e hamutuk ho komisaun A bele dezenvolve di’ak liután iha futuru.

Ho ida ne’e lori komisaun A nia naran, Deputada Carmelita sente ornadu, e konsidera vizita David Paul Lewen ho Kathleen M. Fitzpatrick  oportunu tebes.

“Vizita Embaixadora EUA ho Asesór Legál EUA hodi fó hanoin ba malu atu bele dezenvolve liután Projetu Lei Anti Korrupsaun ne’ebé kompletu no di’ak liután mak Komisaun A sei deside audiénsia públiku.”

Tuir Carmelita atu ba audiénsia públiku, sei presiza testu substitutivu eh lori lei ne’ebé ho nia orijinál, maski durante ne’e (tinan ida) Komisaun A halo análize ona.

“Ami halo ona análize téknika hosi preámbulu to’o artigu ikus, enkuantu ami foin mak atu halo konsultasaun públiku atu parte hothotu bele fó hanoin hodi dezenvolve Lei Anti Korrupsaun.” Nia akresenta.

Parte sira atu fo hanoin mak hanesan; Juiz sira, Prokuradór Jerál Repúblika, Tribunál Rekursu, Defensór sira, Advogadu, JSMP, NGO no seluk tan ne’ebé durante ne’e servisu ba setór justisa, atu fó sira nia hanoin ba projetu lei refere.

Iha fatin hanesan Embaixadora EUA, Kathleen M. Fitzpatrick, reforsa Governu EUA ho Timor-Leste servisu hamutuk iha setór judisiál, liuliu kolabora ho PN hodi dezenvolve lejizlasaun sira, hanesan Lei Anti Korrupsaun no fó formasaun judisiál.

Nu’udar informasaun hosi Embaixadora EUA, asesór David Paul Lewen hala’o servisu asesoria legál ba EUA ho nia esperiénsia durante tinan sanulu resin ida, no servisu mós iha iha Prokuradór Repúblika Federál iha EUA.

Jornalista: Zezito Silva | Editór: Manuel Pinto