DILI, (TATOLI) – Ministru Reforma
Lejizlativa no Asuntu Parlamentár, Fidelis Leite Magalhães, afirma pedidu
fiskalizasaun abstrata ba Lei Atividade Petrolíferu (LAP), ne’ebé hato’o hosi
bankada Opozisaun (Fretilín-PD) iha Parlamentu Nasionál, sei la impede ba
vontade governu atu sosa asoens ConocoPhillips ho Shell.
“Kazu ida ne’e atu haree ba
konstitusionalidade Lei Atividade Petrolíferu nian maibé la iha nesesidade ona.
Tanba fó ona autorizasaun atu governu foti osan direita, tanba ne’e mak parte
governu la iha implikasaun ba pedidu opozisaun sira nian atu halo fiskalizasaun
abstrata,” Ministru Fidelis Magalhães ba jornalista sira, Parlamentu Nasionál,
ohin.
Tuir Fidelis Magalhães katak
pedidu ne’ebé mak opozisaun sira halo ne’e iha argumentu legál no
konstitusionál maibé dala barak tribunál la apoiu sira nia pozisaun.
“Ida ne’e polítika ida mak
opozisaun sira halo, maibé ita haree diskusaun legalidade ne’e se mak los, ita
hein desizaun tribunál nian,” nia dehan.
Entretantu bazeia ba LAP governu
sei levanta osan ho millaun U$ 650 hodi sosa asoens ConocoPhillips ho Shell.
Antes ne’e, Parlamentu Nasionál
(PN) simu ona notifikasaun hosi Tribunál Rekursu (TR) kona-ba pedidu
fiskalizasaun abstrata ba Lei Atividade Petrolíferu (LAP) ne’ebé hato’o hosi
opozisaun parlamentár iha 30 Janeiru foin lais.
Prezidente PN, Arão Noé, dehan,
hafoin TR fó notifikasaun mai parlamentu, konvoka reuniaun ho asesór legál sira
atu prepara resposta hodi hatán ba notifikasaun, dentru loron 10 nia laran.
Kona ba sosa asoens
ConocoPhillips ho Shell, Arão esplika bele hola nafatin tanba prosesu sei la’o
nafatin, kuandu tribunal deside mak foin hapara. Lei labele para tan ho prosesu
reklamasaun ida, tenke ba oin nafatin, la’ós ba kotuk. Ita nia sistema mak
nune’e, la iha ema ida hapara tanba lei iha ona vigor.
Jornalista: Zezito Silva | Editór:
Manuel Pinto
Imajen: Ministru Reforma Lejizlativa
no Asuntu Parlamentár, Fidelis Leite Magalhães
Sem comentários:
Enviar um comentário