TL-Portugal Asina Akordu Kooperasaun Kona-ba Konsolidasaun S3

DILI, (TATOLI) – Governu Timor-Leste (TL) liuhosi Ministériu Solidariedade Sosiál no Inkluzaun (MSSI), Tersa (16/4/2019), asina ona akordu kooperasaun ho Governu Portugal kona-ba konsolidasaun Sistema Seguransa Sosiál (S3).

Akordu kooperasaun ne’ebé asina diretamente husi Ministra Solidariedade Sosiál no Inkluzaun, Armanda Berta dos Santos ho Sekretáriu Estadu Seguransa Sosiál Portugal, Cláudia Joaquim, hala’o iha Ministériu Finansa, Ai-Tarak Laran, Dili.

Ba jornalista sira hafoin parte rua asina tiha akordu kooperasaun ne’e, Ministra Armanda Berta dos Santos, klarifika katak, asinatura kooperasaun ne’e importante tebes ba kriasaun no konsolidasaun sistema seguransa sosiál. Nune’e, sai mós hanesan instrumentu legál ida hodi kontinua servisu hamutuk entre TL ho Portugal iha área intervensaun ba protesaun sosiál no inkluzaun ba ema vulneravel nomeadamente direitu labarik sira, idozu sira no ema defisiénsia hotu.

Husi akordu ne’e, Ministra Armanda Berta dos Santos, esplika, programa espesífiku sira ne’ebé sei apoiu hosi Portugal, hanesan reforsu institusionál, estabelesimentu sistema kona-ba protesaun sosiál no institutu seguransa sosiál iha TL. Alien ne’e, atu hadi’a planifikasaun institusionál ba implementasaun polítika públika iha área protesaun labarik no ema ho defisiénsia tuir padraun internasionál.

Antes ne’e, iha 2012, Governu TL hahú introdús polítika iha área rejime kontributivu seguransa sosiál, ne’ebé ba de’it funsionáriu públiku sira iha faze tranzitóriu.

Iha 2016, nesesáriu tebes hodi kontinua programa protesaun sivíl no Kontributivu ba traballadór hotu, inklui sira nia família, ho objetivu atu proteje traballadór sira ne’ebé kontribui ba atividade ekonomia no ajuda haree poupansa ba futuru.

“Ita hotu hein katak akordu entre nasaun rua ne’e sei fó espasu di’ak liután ba tékniku sira hodi kontinua halo liuliu iha setór seguransa sosiál iha Timor-Leste”, hateten Armanda Berta dos Santos.

Iha fatin hanesan, Sekretáriu Estadu Seguransa Sosiál Portugal, Cláudia Joaquim, mensiona katak, asinatura kooperasaun ne’e signifikativu ba Ministériu Traballu Solidariedade no Seguransa Sosiál atu bele apoia malu iha setór importante sira hanesan kriasaun no konsolidasaun ba sistema seguransa sosiál iha TL.

Jornalista: Zezito Silva | Editór: Francisco Simões

Imajen: Ministra Solidariedade MSSI Armanda Berta dos Santos ho Sekretáriu Estadu Seguransa Sosiál Portugal, Cláudia Joaquim, Tersa (16/4/2019), iha Ministériu Finansa, Ai-Tarak Laran, Dili, asina akordu kooperasaun kona-ba konsolidasaun Sistema Seguransa Sosiál (S3). Imajen/António Gonçalves