KAZU JOÃO CANCIO, ASESOR INTERNASIONAL SAI ARGUIDU

Asesor internasional Ana Noronha ho Thomas Nehrmann, ne’ebe Minisateriu Edukasaun kontrata iha tempu Ministru Edukasaun, João Cancio Freitas nian, bele sai arguidu ba kazu projetu Radio ho Televizaun Edukasaun.

Projetu ho nia montante orsamentu milloens 2 USD ne’e, involve eis Ministru João Cancio ho eis Diretor Nasional Administrasaun, Finansas, Logistika no Aprovizionamentu ME, Tarcisio do Carmo.

Arguidu nain rua ne’ebe Ministeriu Publiku notifika no akuza komete krime krime Partisipasaun Ekonomia no Negosiu tuir artigo 299 Kodigo Penal.

Durante julgamentu iha iha faze dahuluk ne’ebe mak hala’o iha Segunda to’o Kinta (04-14/05/2015), Tribunal rona tiha ona testamunha balun kompostu husi Xefi Gabinete Protokolu ME, Agosto Bareto, Eis Vise Ministru Edukasaun, Paul Asis Belo, eis Vise ME asunto Ensino Secundario Jeral, atual Prezidente Komisaun Homenajen, Virgilio Smith.

Kuaze deklarasaun husi testamunha sira ne’e hateten katak, asesor internasional ne’ebe mak ME kontratu hanesan, Ana Noronha no Thomas Nehrmann mak hatene ka partisipa mos iha prosesu projetu atu sosa ekipamentus Televizaun Edukasaun nian ne’ebe mak iha kazu konkretu.

Husi deklarasaun sasin sira nian ne’e, Ministeriu Publiku rekore ba Tribunal atu notifika asesor nain rua ne’e hodi mai presta deklarasaun iha tribunal hanesan testamunha, maibe husi Parte Defeza ne’ebe mak fo asistensia legal ba arguido sira rekere mos ba tribunal katak, aleinde sai testamunha Defeza mos husu atu akuza asesor sira ne’e, tanba sira mos involve hotu iha kazu konkretu.

“Parte defeza mos hakarak rekere ba tribunal katak, tenke akuza mos asesor internasional Ana Noronha ho Thomas, tanba durante deklarasaun husi testamunha sira ne’e temi sira nia naran entaun ita hare sira mos involve hotu,” hateten Advogadu privadu, Manuel Guterres ne’ebe mak fo asistensia legal ba arguidu sira iha Tribunal Distrital Dili.

MP mantein ninia rekerementu katak sei hodi Ana Noronha no Thomas atu mai iha Timor hodi fo sasin tan no kona ba rekerementu MP ne’e tribunal simu, maibe kona ba Defeza nian sei hare iha prosesu kuandu rona tiha ona testamunha internasional sira nian.

Tribunal fo tempu loron 30 ba MP atu notifika asesor internasional sira ne’e hodi mai iha Tribunal, maibe antes adia tribunal mos rona sasin ida husi asesor internasional ne’ebe mak ME kontratu, Pedro Figueredo.

Pedro Figueredo hateten, nia lahatene kona ba dokumentus kontratu nian ba iha projetu atu sosa ekipamentus Televizaun Edukasaun.

Nia hatutan, momentu ne’eba ME rasik laiha orsamentu atu loke projetu ne’e, mais osan ho total miloens 2 USD ne’e foti husi Fundu kontijensia iha Primeiru Ministru nian ne’ebe prosesu tomak iha Ministeriu Finansas.

Julgamentu ba kazu ne’e prezide husi Juis kolektivo kompostu husi Juis prezidente Jose Maria Araujo, akom panha mos husi Juiza Jumiaty M. Freitas ho Fransisca Cabral. MP reprezenta husi Prokura dor Jacinto Babo ho Lidia Soares. Arguidu sira hetan asistensia legal husi advogado probadu Jose M. Guterres no Manuel Tilman. Julgamentu ne’e adia hikas ba iha loron 8 Junhu 2015, tuku 09:30 Otl, hodi rona testamunha husi asesor internasional. may

Jornal Nacional