GOVERNU SEI BLOKEA ‘SITUS’ PORNOGRAFIA

Governu sei blokea situs (sitio) pornografia ne’ebe la’o maka’as los iha Timor Leste, tanba estudante barak mak fasil asesu.

Vise Ministru Obras Públika Transporte no Komunikasaun, Inacio Moreira dehan, dadauk ne’e Governu esforsu ona atu haree hahalok at sira iha internet, tanba ladiak ba labarik estudante sira.

“Kona-ba pornografia ne’e, ami kordena ona ho ANC, ho diresaun IT ninian, para depois ami bele organiza, halo nusa mak bele regulariza, hodi bele blokea ba hahalok ruma, li-liu kona-ba pornografia ka hahalok ruma ne’ebé la diak no liafuan sira ne’ebé ladiak iha Internet,”dehan Inacio Morreira ba JN-Diário iha nia kna’ar fatin Caicoli Dili, Sabadu (13/6).

Inacio mós rekoñese katak, los duni, dadauk ne’e labarik barak mak fasil atu asesu ba lia fuan a’at ka imajen sira ne’ebé ladiak iha Internet.

“Oras ne’e dadauk ami traka hela, ita hein katak, lakleur deit buat ne’e bele realiza,”katak Inacio.

Nia hatutan, durante ne’e sira seidauk halo estudu kona-ba estudante husi eskola ne’ebé mak asesu barak liu ba iha pornografia ne’e, maibé ida ne’ebé iha hatudu katak, fasil ba labarik sira atu asesu ba pornografia.

Iha parte seluk, Inacio Morreira mós informa katak, dividas Governu nian ba Timor Telecom ho montante US$ 8 mil ne’e, seidauk rezolvidu.

“Buat ne’e se iha hela prosesu nia laran, ita hein katak, iha tempu badak, Governu liu husi Ministeriu Finansas bele rezolve lalais,”katak Inacio Morreia.cos

Jornal Nacional