PNTL LA AUTORIZA L-7 HALO DEMONSTRASAUN

Ministru Interior (MI), Longuinhos Monteiro, informa, pedidu eis gerileiru Cornelio Gama ‘L-7’ ne’ebé hatama ba Policia Nacional de Timor-Leste (PNTL), hodi husu autorizasaun ba hala’o manifestasaun bo’ot ba injustisa iha rai laran la hetan atutorizasaun husi Komdando Jeral PNTL.

“Karta ne’ebé maka diriji ba komando jeral, laiha intervensaun husi Governu, maibe komando jeral PNTL informa mai ha’u katak pedidu atu halo demonstrasaun ne’e indifire tanba laiha objetivu ida klaru,”deklara Ministru Interior Longuinhos Monteiro ba JN-Diário hafoin partisipa iha misa solene vicentenario santo Antonio iha parrokia Manatuto, Sesta (12/06).

Longuinhos hatutan, pedidu ne’e PNTL la aseita tanba atu lori ema barak halo demostrasaun iha Dili laran, tanba ida ne’e pozisaun Polisia Nasional nian, komando jeral mos informa ona ba L-7 halo enkonsiderasaun ba karta ne’ebe maka nia haruka ba Komando Jeral.

“Objetivu iha karta ne’e la klaru tanba atu halo demonstrasaun ba paz nasional, ne’e paz saida nian? tanba ita Timor Paz hela, problema saida tenke iha objetivu ida klaru para bele justifika,”dehan Longuinhos nu’udar eis komandante Jeral PNTL ne’e.

Nia dehan, PNTL la aseita pedidu la signifika viola direitu maibe tenke iha obejetivu klaru no oportunu hodi hala’o demonstrasaun.

“Halo demonstrasaun ba injustisa halo petisaun, hakerek karta ba tribunal, tanba demonstrasaun la resolve problema justisa, laiha autorizasaun, se halo ho forsa, polisia forsa sei kaer,”Longuinhos Subliña.

Antes ne’e, eis gerileiru Cornelio Gama L-7 hatama pedidu ba Komando jeral PNTL hodi hetan autorizasaun para depois hala’o asaun pasífiku durante loron rua (26-28) ne’ebé sei konsentra iha Munisípiu Dili, ne’eb’e demonstrasaun ne’e voka liu ba injustisa no Korupasaun ne’ebe buras iha Timor Leste(TL).

“Asaun ne’e ami koalia kona ba injustisa no korupsaun ne’ebe buras liutan iha Timor Leste para bele rezolve problema sira ne’e hotu,”L-7 hatete lia hirak ne’e ba Jornalista sira iha Komandu PNTL, Caicoli, Kuarta (10/06), bainhira hato’o karta pedidu asaun pasífiku ba Komandante Jeral PNTL.

L-7 konsidera katak injustisa akontese husi kedas 1975 to mai 2000 ne’ebe naksalak barak seidauk bele rezolve, nune’e labele iha tan konflitu iha rai Timor-Leste ne’e iha futuru.

“Ita buka resolve naksalak sira ne’e, labele iha tan konflitu entre ita povu Timor Lorosae ita buka meius resolve diak liutan” afirma L-7. Eus

Jornal Nacional