IGREJA INISIA REKONSILIASAUN!

Jornal Nacional, editorial

Dia 13 de Junho Igreja Paroquia Santo Antonio Manatuto selebra misa solene vicentenáriu SantoAntonio nian . Ho serimonia tinan 200 Santo Antonio Padrueira Paroquia Manatutu nian nee governu lokal, Municipo Manatuto ho igreja paroquia Manatuto halao serimonia Rekonsiliasaun entre Manatutu Anan iha Manatutu no Manatuto anan husi diaspora (Kupang – Atambua) Indonesia nebe fahe malu besik tinan 16 ona tamba difrensia politika, molok no depois de referendum 1999.

Inisiativa rekonsiliasaun via igreja katolika nee diak tamba igreja iha influensia bo’ot, nunee mos Timor Leste maioria populasaun relijiaun Katolika, tan nee Igreja inisia ona ka kontinua politika rekonsiliasaun nebe pais nee halao ona hodi lori hikas fali maluk timor oan sira nebe halai ba Indonesia, ne’e pasu ida nebe diak teb-tebes.

“…nu’udar sarani imi hakerek fali foun ida, kona-ba historia Timor nian hodi habo’ot no hametin liu tan Katolisismo nia forsa no influensia iha Timor oan sira nia moris,”Dom Basilio Koalia konaba rekonsiliasaun, ita koalia konaba Xanana Gusmão tamba Maun boot nee mak sai pioneru ka aman ba rekonsiliasaun, aman ba hadame malu, aman ba simu malu no aman ba perduador.

Inisiativa rekonsiliasaun nee mai husi Xanana Gusmão nebe hetan apoiu husi lider jerasaun antigu sira, Jose Ramos Horta ho mos Mari Alkatiri hodi nunee politika rekonsiliasaun nudar prioridade atu oinsa bele lori fila timor oan sira iha Atambua – Kupang no mos rekonsiliasaun entre estadu Timor ho estadu Indonesia hodi harii Commission of Truth and Friendship (CTF ) hodi solusiona problema pasadu nasaun rua nee .

Rekonsiliasaun nee konsege lori fila timor oan lubuk boot mai fali ninia moris fatin laiha.

Problema, nunee mos rekonsiliasaun entre estadu Timor ho Indonesia susesu tamba pais rua ho komitementu bot haluha pasadu, hateke ba oin, taka justisa ba autor krime graves parte militar indonesia no mos nasaun rua kompremete hakarak sai vizinhu nebe diak.

Besik tinan 16, maibe timor oan barak mak sei hela iha Atambua – Kupang, lakohi fila fali mai Timor Leste tamba sira sei tauk, keta halo ba fila mai ninia maluk sira iha Timor la simu, halo Viloensia, tan nee rekonsiliasaun Manatutu Anan nee diak teb-tebes bele sai ezemplu atu Municipiu sira seluk bele banati tuir.

Rekonsiliasaun entre Timor Leste ho Indonesia bele dehan lao efektivu tebes eh sai ezemplu ba Mundo tomak. Timor Leste ho Indonesia, pais rua nebe konflitu durante tinan 24 nia laran, simu malu fali no sai amigu nebe diak.

Igreja bele halo esforsu ba rekonsiliasaun hodi enkoraza timor oan sira nebe sei iha Atambua – Kupang nee fila maibe atu fila ka la fila nee depende fila fali ba vontade ema ida idak nian, labele.

Obriga, se lae komete fali violasaun direitus humanus.

Agora duvida mak saida mak governu atu garante ba ema sira nee atu fila? Tenki iha kondisaun ida, se lae susar tamba ema sira nebe kontinua hela iha Atambua – Kupang tamba sira maioria eis Funsionariu Publiku, eis militar no polisia nebe garantia pensaun nee iha.

Importante mak labele bandu ema atu mai visita ninia rai moris fatin nee, Timor Leste nee ba timor oan hotu, Timor oan hotu ninian, odamatan Timor Leste nee nakloke ba timor oan nebe hakarak fila fali mai. (*)

Jornal Nacional, editorial