Portugal ho Timor-Leste serbisu hamutuk hodi estabelese fali koperasaun iha Justisa

Portugal ho Timor-Leste serbisu hela iha projetu ida prokolu nian iha área Justisa nian hodi estabelese fali koperasaun entre nasaun rua ne'e, haktuir hosi ministra Justisa Portugal nian, Paula Teixeira da Cruz. 

"Iha ona projetu ida protokolu nian nebe ami sei serbisu hamutuk iha tempu badak", ministra Justisa portugeza nian hatete ba Lusa bainhira hakotu reuniaun ho ministru Estadu no Prezidénsia Konsellu Ministru sira timoroan nian, Agio Pereira, iha Ministériu Justisa, iha Lisboa.

Iha fulan-Novembru 2014, Governu timoroan hasai hosi nasaun majistradu internasionál na'in hitu, na'in neen ema portugés no na'in ida hosi Cabo Verde, tanba "motivu maka'as interese nasionál nian".

Iha tempu ne'ebá primeiru-ministru timoroan maka Xanana Gusmão justifika ona desizaun ne'e ho sala sira iha prosesu nebe envolve Estadu timoroan no empreza petrolíferu sira iha folin aas liu dolár millaun 30. Majistradu sira nebe hetan espulsu afirma ona katak desizaun ne'e foti tanba prosesu sira relasionadu ho korupsaun hasoru funsionáriu importante sira iha Estadu.

Nune'e Portugal, liuhosi primeiru-ministru portugés, Pedro Passos Coelho, fó sai suspensaun ba koperasaun iha área judisiáriu no organizasaun internasionál oioin no la'ós governamentál sira apela ona ba Governu timoroan hodi respeita separasaun kbiit nian.

"Ha'u fiar katak buat hotu konjuga ba efeitu ne'e (estabelese fali koperasaun). Agora daudaun, ami serbisu ona iha protokolu ida no, nune'e, ami fó hakatak importante ida hodi estabelese fali koperasaun bilaterál nebe nasaun rua ne'e hakarak", ministra ne'e hatutan.

"Hanesan nasaun rua nebe iha ligasaun, hanesan nasaun maun-alin. Ami nia reuniaun iha vantajen tebes. Hanesan reuniaun ida nebe ami iha oportunidade hodi fó hakat metin ida iha relasaun hodi estabelese fali koperasaun", ministra ne'e hatutan.

Iha fatin seluk, Agio Pereira refere katak akordu ne'e reativa fali "ho ajustamentu iha nesesidade sira nebe situasaun eziji hodi hadi'a prosesu koperasaun bilaterál nian hodi bele hetan rezultadu iha tempu naruk", nia hatutan katak Timor-Leste "presiza tebes koperasaun ne'e".

Iha loron-segunda, iha Lisboa, ministru Estadu no Prezidénsia hosi Konsellu Ministru sira timoroan nin konfirma tiha ona hanoin hodi estabelese fali koperasaun ho Portugal iha área Justisa, nia refere katak "hanesan prioridade ida" ba Governu Timor-Leste nian.

SAPO TL ho Lusa