DEPUTADU FRETILIN LARAN MORAS PROJETU JARDIN IHA OECUSSI LAHIA KUALIDADE

DILI - “Jardin sira ne’e ita haree nia kualidade ne’e ita nia laran moras tebes, bainhira ita kaer kona ai-rin sira, raihenek no simente sira ne’e namtate de’it,” lamenta deputadu Manuel Castro hosi bankada FRETILIN iha Plenária Parlamentu Nasionál, Segunda (21/9).

Deputadu Castro nu’udar membru Komisaun E (trata asuntu Infra-estrutura, Transporte no Komunikasaun) hala’o fiskalizasaun ba Oekusi hakfodak tebes situasaun ne’e.

Tuir Castro, grande projetu laiha problema ho nia kualidade, maibé projetu ki’ik balun ne’ebé ho nia kustu millaun $1 resin liuliu iha jardin sira ne’ebé maka lokaliza iha tasi ibun presiza tebes hetan atensaun sériu hosi governu.

Ho kualidade projetu ne’ebé maka hatudu ladiak, deputadu Manuel Castro mós konfuzaun tanba inisiu prosesu tenderizasaun ne’e rasik.

“Ninia prosesu ne’e tenderizasaun ka fó de’it. Tanba projetu ne’ebé ho nia valor millaun $1 resin, maibé nia kualidade ne’e halo ita nia laran moras,” hatutan deputadu Castro.

Castro husu ba Komisaun Anti Korrupsaun (KAK) atu halo investigasaun hasoru kompaña ne’ebé maka responsabliza inklui investiga mós ministériu ne’ebé maka fó projetu ne’e.

“Ami konfirma ho ZEEMS dehan katak projetu ne’e nasionál nian, kontrola hosi Ministériu no Ajénsia Dezenvolvimentu Nasionál,” haktuir Castro.(tay)

Timor Post