DIFISIL JULGA AUTOR KRIMI GRAVES

DILI - Proseu julgamentu ba kazu krime graves ne’ebé akontese durante Indonézia invade Timor Leste ne’e difisil tebes tanba autór sira sei hela iha Indonézia.

Prezidente Tribunal Rekursu  Guilhermino da Silva, esplika, regulamentu UNTAET sei válidu  hela, hodi hala’o prosesu julgamentu krimi graves ne’ebé to’o agora  kazu barak sei suspende hela iha tribunál, maibé maoria ema akuzadu hirak ne’e sei hela iha rai liur liu-liu Indonézia.

“Prosesu ba krimi graves ne’e seidauk taka, karik taka mós sei presiza ho lei ruma, maske ho forsa diplomasia mós susar atu taka prosesu refere, so liuhosi forsa legal maka bele taka, agora prosesu labele lao, tanbá pratikamente autor sira  akuzadu barak hela iha Indonézia,” esplika Prezidente Tribunal Rekursu  Guilhermino da Silva ba Timor Post iha nia kna’ar fatin foin lalais ne’e.

Iha oportunidade Guilhermino hatete, prosesu ne’ebé CAVR no CVA hala’o atu la lori autor hirak ne’e mai justisa, maibé sira nia servisu hare liu ba rekonsiliasaun.

“Agora programa CAVR ho CVA taka ona. Loloos antes atu taka programa hirak ne’e tenke ho lei ruma, para nia fundamentu legal ne’e iha, la’ós  ko’alia no diplomasia de’it, tanbá ne’e la’ós  meus própriu atu rezolve problema,” subliña Gulhermino.

Entretantu kona-ba kazu krime graves barak pendente iha Tribunál, Juis Administrador Munisípiu Dili, Duarte Tilman, esplika, nia parte labele halo prosesu tanba tuir lei inan konstituisaun RDTL artigu 163 la fó kompeténsia  ba juis nasionál  sira halo julgamentu.

Duarte Tilman hatete, antes ne’e tribunal hala’o ona julgamentu ba kazu krimi graves kontra umanidade ne’ebé akontese iha tempu pasadu, maibé ho rejolusaun ne’ebé Parlamentu Nasionál no Governu hasai hodi duni Juis internasionl sira fila, prosesu kazu refere paradu no pendente to’o ohin loron.

Tuir  lei inan artigu 163, prosesu julgamentu ba kazu krimi graves, tenke kompostu hosi juis internasional nain rua, ho juis nasionál  nain ida. Ho ne’e maka agora la fó fatin ba juis nasionál  sira hodi ezerse funsaun.

Atu prosesu ba kazu sira ne’e, Duarte Tilman subliña, Prezidende Tribunal Rekursu, tenke ko’alia  ho orgaun soberania ne’ebé halo lei. Karik labele altera lei refere, entaun governu tenke halo rekrutamentu  ba juis internasional sira, se labele ona rekruta juis internasional ba kazu krimi graves, entaun tenke altera lei ne’e para fó kompeténsia  ba juis nasionál  sira hodi halo julgamentu.

Nune mós Juis Admistrador Munisípiu  Baucau, Afonso Carmona, haktuir, durante kazu kontra umanidade ne’ebé rejistu iha TDB, tenke haruka prosesu ba Tribunal Munisípiu Dili.

Relasiona kestaun ne’e, sosiedade sivíl sira preokupa tebes ho desizaun polítika estadu nian ne’ebé diretamente halo intervensaun ba prosesu justisa.

Diretór Asosiasaun HAK Manuel Monteiro, hatete, nia parte iha momentu estadu duni juis internasionál sira halo reasaun maka’as tanba desizaun ne’e kontra lei inan artigu 163.

“Ami trsite no lamenta tebes tan (desizaun estadu) nia impkatu maka agora vítima  ba kazu krimi graves, la hetan justisa  ba sira nia família,” hatete Monteiro.

Justisa Tenke La’o

Entretantu Monteiro hatete, kazu krime kontra umanidade  ne’ebé akontese iha Timor-Leste durante tinan 1974 to’o 199 tenke responsabiliza hosi  Estadu Indonézia, tanba violasaun direitus umanu ne’e akontese ho sistemátiku.

Autor ba krime grave kontra umanidade  durante tinan 24 iha Timor-Leste mak saudozu Prezidente Repúblika Indonézia, Soeharto, Jeneral Wiranto, Prabowo no seluk tan ne’ebé to’o ohin loron la’o livre hela iha sira nia rain.

“Ami insisti justisa pasadu ne’e tenke la’o hodi bele determina justisa ida agora no justisa futuru, tanba kuandu kazu krime kontra umanidade iha tempu pasadu mak ita konsege prosesa tuir Dalan legal mak foin bele dehan hakotu siklu impunidade iha ita nia rai nomos iha mundu,” hatete diretór  Manuel Monteiro ba Timor Post iha nia serbisu fatin Farol-Dili, Kuarta (26/08).

Diretór  ejekutivu Judicial System Monitoring Program (JSMP), Luis Sampaio katak, JSMP kontinua defende ba sira ne’ebé sai vítima ba iha hahalok krime pasadu nian. Hanesan sidadaun ida, vítima sira iha mós direitu fundamental atu hetan kompensasaun sira nia prejuizu (kerugian) iha tempu pasadu.

“Ha’u hanoin iha situasaun atual agora ita iha problema tanba ne’e refere ba rekursu iha Tribunal sira katak prosesu julgamentu ba kazu krime grave kontra umanidade  tenke involve juíz internasionál, maibé infelizmente ita nia governu duni sai tiha sira ona. Tanba ne’e ha’u fiar katak espetativa justisa ba krime pasadu ne’e to’o agora malahuk tiha ona,” hatete Luis Sampaio ba Timor Post iha nia serbisu fatin Colmera-Dili, Kuarta (26/08).

Nune’e mós diretór  Asia Justice and Right’s (AJAR), José Luis Oliveira hatete krime grave kontra umanidade  ne’e responsabilidade komunidade internasionál inklui Timor-Leste rasik, maibé prosesu justisa ba krime pasadu atu la’o ho di’ak ne’e depende ba Estadu ne’ebé afeitadu hosi  krime ne’e rasik. Justisa ba krime pasadu ne’e labele substitui fali ho ukun rasik a’an ka libertasaun patria, maibé tenke prosesa tuir dalan legal.

La’ós Responsabilidade Estadu Indonézia

Antes ne’e, eis Prezidente Repúblika, José Manuel Ramos Horta hatete, krime kontra umanidade  ne’e responsabilidade individuál, la’ós  Estadu nia responsabilidade. Tanba, Timor-Leste sei la lori Estadu ba prosesu iha Tribunál, maibé lori ema.

“Ema ne’e bele reprezenta Estadu, maibé nia mak responsabiliza ba krime sira, la’ós  Estadu mak responsabiliza,” hatete laureadu Nobel da Paz 1996 ba Timor Post iha Hotel-Timor, Dili.

Horta hatutan, sira ne’ebé responsbiliza ba krime kontra umanidade  iha Timor-Leste mak hosi  matebian Prezidente Soeharto to’o nia Jenerál sira ne’ebé ejekuta orden ne’e iha baze.

“Portantu, iha ita nia kazu desde Kay Rala Xanana Gusmão sei asume kargu Prezidente Repúblika to’o ohin loron, desijaun mak ne’e ita la buka Tribunál Internasionál atu halo justisa ba autor sira, tanba Timor-Leste nia filosofia desde uluk kedas katak, ita la buka Tribunál Internasionál,” esplika Horta hodi hatutan, maibé Indonézia rasik bainhira sira nia demokrasia metin no tasak no bainhira sira nia justisa maka’as, se sira rasik mak hakarak halo justisa, tanba krime barak akontese la’ós  iha Timor-Leste de’it, maibé akontese mós iha Aceh, Jawa, Papua, Tanjung Priok.

Nia hatutan, prosesu estabelesementu Tribunal Internasionál la’ós  fasil, tanba bazeia ba referênsia Cambodia nian katak, tenke gasta tinan 10 no gasta mós osan hamutuk millões USD 200,000 maka foin konsege halo julgamentu ba autor nain rua de’it, maibé tribunál ne’e kahur ka Tribunál Hibrida.

Okupasaun Repúblika Indonézia ba Repúblika Demokratika Timor-Leste (RDTL) durante tinan 24 nia laran, rezulta ema Timor oan kuaje rihun 300 mak mate nomos lakon ho sira nia hela fatin no rikus soin tomak. Tanba ne’e, vítima kontra umanidade  ezije maka’as ba governu atual hodi loke hikas justisa ba autor kontra umanidade  hahu hosi  tinan 1974 to’o tinan 1999 tanba autor balun ba kazu ne’e to’o oras ne’e sei la’o livre hela, entretantu vítima sira kontinua moris iha ki’ak no susar nia laran.

Entretantu relatoriu final hosi  Comição Acolhamento Verdade e Reconciliação (CAVR) ho naranCHEGAhatudu timor oan kuaje ema nain 18,600 mak mate no hamutuk nain 853 mak lakon durante okupasaun Indonézia iha Timor-Leste. Maske nune’e, to’o ohin loron seidauk iha prosesu julgamentu ba autor sira.(max/oki)

Timor Post