DGMH SEI SOBU MERKADU AMBULANTE

Servisu Diresaun Gestaun Merkadoria e Higeni (DGMH) sei sobu merkadu Ambulante (mini merkadu-Red) ne’ebe maka vendedores balu kontinua kria iha estrada ibun.

DGMH sei sobu merkadu ambulante, tanba dala barak kria fila fali engrafamentu iha fatin publiku hanesan merkadu ambulante iha parte Comoro (Kampung Baru) vendedores sira fa’an sasan iha estrada ibun.

“Ami sente ladun diak tanba movimentu komprador ho transporte kuaze hanesan deit iha estrada ibun hanesan ne’e, dalan mos klot tan, e merkadu kik ne’ebe vendedor kria. tuir lolos tau hamutuk vendedor sira laos fo fali oportunidade atu kria fali tan merkadu kik tanba ne’e fo impaktu ba movimentu transporte publiku,”hateten Lorenso da Costa nudar komunidade ba JND iha Kampung-Baru-Dili Kuarta (08/10) ne’e.

Tuir nia atu rezolve problema ne’e refere Governu liu husi dirasaun kompetenti tenke kria regras forti hodi regula vendedores nakar.

“Se karik sei kontinua ho merkadu ki’ik hodi halo negosiu iha tempu lokraik se bele fo sansaun ba sira atu nune tauk labele fa’an tan sasan ou kria merkadu ki’ik iha fatin publiku hanesan ne’e,”afirma Lorenso.

Hatan konaba asuntu ne’ebe refere, Chefi Dirasaun Gestaun Merkadoria e Higeni (DGMH) Bonifacio Soares sei tau atensaun ba kestaun ne’e hodi labele prejudika movimentu transporte publiku.

“Patrulhamentu lao nafatin karik hetan ami sei foti soe nafatin sira nia sasan, so que vendedor mak laiha konsiensia no sira uja tempu ami deskansa nian mak kontinua fa’an fali. E durante ne’e laiha tan sansaun seluk, sansaun maka karik ami hetan sei foti soe hotu sira nia sasan inklui gerobak, maibe ho informasaun ne’ebe hau hetan ona, hau fiar katak seguransa sivil (Walikota-Red) iha tempu badak sei to’o iha fatin neba,”hateten Bonifacio. Ita

Jornal Nacional