FAILANSU FRONTEIRA, LA’OS SALA MIGRASAUN HO UPF

Fundasaun Mahein konsidera failansu sira ne’ebé akontese hodi hamosu desintendementu entre komunidade Timor Leste (TL) ho Indonesia ne’ebé hela besik iha fronteira, la’os sala servisu migrasaun ho Unidade Patroillamentu Fronteira (UPF), maibé sala Governu nian.

Tanba materiál importante sira ne’ebé mak presiza hodi hala’o servisu iha fronteira ne’e, limitadu tebes.

“Dalabarak ita fó sala ba UPF, fó ba servisu migrasaun, maibé ita nia rekursu mak limitadu, postu operasaun sira iha fronteira mós limitadu,” katak Vise Diretur Fundasaun Mahein, João Almeida Fernandes ba jornalista sira iha Comoro Dili, Kuarta (07/10)

João Almeida informa katak, iha fronteira terrestre nian mós, hamosu ona problema barak, tanba meius sira ne’ebé ema uza atu servisu iha fronteira ne’e, aat hotu ona.

Tanba tenik João Almeida, dalabarak komunidade sira la’o do’ok mak ba migrasaun atu hetan legalizasaun husi migrasaun atu ba vizita familia iha Atambua Indonesia, entaun sira hili dalan ilegál, tanba relasaun komunidade sira iha fronteira ne’e, metin tebes.

“Fronteira marítima ninian, ita iha forsa defeza no forsa seguransa polisia, servisu balun ita halo ho susesu, maibé balun la konsege,”afirma João Almeida.

João Almeida esklarese, Governu tenke hatene buka meius, oinsa mak atu bele kontrola komunidade sira iha fronteira ne’e, hodi labele la’o bei-beik husi dalan ilegál.

Tanba João Almeida fundamenta katak, realidade hatudu katak, iha fronteira terrestre ne’e, ema hotu bele halo vizilansia sai ba Indonesia no tama mai TL.

Alénde ne’e, Governu mós tenke hametin servisu iha fronteira ninian, tanba dalabarak ema sempre hamosu situasaun ne’ebé ema barak la espera.

João Almeida esklarese, komunidade sira husi Indonesia ho TL dalabarak hili dalan ilegál hodi hala’o atividade negósiu no seluk tan, tanba Governu laiha kontrolu ba ida ne’e.

João Almeida dehan, situasaun ida ne’e mós, labele fó sala ba komunidade sira, tanba sira hili dalan ida ne’e hodi buka osan atu sustenta sira nia familia uma laran.cos

Jornal Nacional