TEMPU BADAK NAKROMA 2 TO’O TL

Roo berlin Nakroma 2 sei to’o iha Timor Leste iha tempu badak, hodi fasilita konetividades transportasaun no movimentasuan povu Timor Leste ninian.

Visi Ministru Negosius Estranjeirus i Kooperasaun (MNEK), Roberto Soares informa katak, roo Berlin Nakroma 2 ne’e, Timor Leste hetan apoiu husi Governu Alemaun.

“Iha tinan hira tuir mai, sei realiza tan kooperasaun ita nian, hodi lori roo Nakroma 2, atu bele ajuda iha prosesu konektividade transportasaun, atu lori movimentasaun ita nia povu, no ita nia fasilidades ne’ebé ke iha ba ita nia teritoriu tomak,”informa Roberto Soares iha MNEK Dili, hafoin asina notas intendementu ho Governu Alemaun.

Delegasaun Governu Alemaun nian ne’ebé mai Timor Leste ne’e, lidera husi Head of division Development Police Asia, Brunhilde Vest.

Roberto Soares hatutan, pertenente kooperasaun ne’e, ba Ministériu relevante sira hanesan, Obras Públika Transporte i Komunikasaun, Agrikultura, Joventude no Desportu, inklui mós SEPFOPE.

Nia informa, antes ne’e ministériu hirak ne’e, halo ona konsentrasaun iha MNEK hodi halo konsultasaun intensiva ida, atu hamosu pontu intendementu.

“Pontu diskusaun ho Alemanha ne’e, hetan intendmentu ne’ebé diak tebes, tanba ne’e mak, ohin ita asina dokumentu ida, la’os dokumentu ne’ebé kesimetin kooperasaun, maibé ida ne’e hanesan, rezultadu husi diskusaun ne’ebé mak ami halo, iha termus seluk hanaran, akta husi reuniaun, atu sai hanesan sasukat i progresu kooperasaun entre Timor Leste ho Alemaun nian,”informa Roberto Soares.

Nia hatutan, Alemanha kontinua nafatin retera sira nia prontidaun hodi reforsa kooperasaun ho Timor Leste, iha áreas konkretas balu.

Roberto Soares lori Governu nia naran, fó agradesementu ba delegasaun Alemanha nian ne’ebé la’o dok husi Berlin, hodi mai hametin kooperasaun ho Timor Leste.

Nia afirma, Governu Timor Leste agradese tebes Governu Alemaun, tanba fó ona sira nia enerjia no tempu tomak hodi mai to’o Timor Leste atu haree progresu dezenvolvimentu Timor Leste nian.

“Horkalan (horibairua kalan), Alemaun mós halo sira nia festa iha Timor Leste, hodi komemora tinan 25 unifikasaun Alemaun ninian iha ita nia nasaun,”tenik Roberto.

Nia esklarese, selebrasaun ne’ebé mak alemaun halo iha Timor Leste ne’e, sai hanesan inspirasaun no motivasaun ba povu Timor Leste kona-ba, oinsa mak atu bele unifika sira nia diversidade ho objetivu ida de’it.cos

Jornal Nacional