FETO MÓS BELE HALO SERBISU HANESAN MANE

Feto la’os deit sai dona de casa, maibé bele halo serbisu mane sira halo, hanesan lori ai, fera ai, halo to’os no fila liman ba mai no serbisu mane nian sira mos bele halo.

“Ha’u hanesan feto, ha’u mós bele halo serbisu mane nian, tanba ha’u bele leba modo karon bo-bo’ot tula ba kareta bele mai fa’an iha kapital Dili laran, atu nune’e bele sustenta familia uma laran,”hateten Joana de Jesus hanesan vendedor ne’ebé fila liman ba mai Dili Aileu ba JN-Diário iha Tasibesi Kinta (8/10).

Nia hateten, wainhira serbisu ne’ebé karik feto bele halo, hanesan feto sira mos prontu atu halo, tanba sei hein deit mane, dalabark buat hotu la lao, tanba tur feto sira katak, wainhira atu ba halo to’os bo’ot ruma feto mos tenki akompania ba halo hotu.

“Ami halo serbisu atu ho mane hanesan, tanba ami mos bele hit modo karun tula sae ba kareta, depois lori to’o iha Dili ami hatun rasik, ne’ebé ami hanesan feto toman tiha ona ho serbisu hanesan ne’e, “hatete Joana de Jesus.

Iha fatin hanesan Margarida da Silva hanesan vendedores afirma katak, nia hanesan feto husik hela oan ba nia aman maka haree, nia tenki lori modo, aifarina, aifuan, ho sasan sira seluk tenki ba mai Dili.

“Modo ho aifarina ho sasan sira seluk ne’ebé ami lori mai fa’an ne’e, ami rasik maka halo to’os hodi kuda, i dalaruma ami ba sosa fali iha fatin seluk, no ami dalaruma nakukun deit ami iha tiha Dili ona,”katak nia.

Tiur nia katak, wainhira sira kuandu ba halo to’os, dalabark mane la tuir sira ba ida, entaun sira rasik mesak ba halo to’os to’o kalan maka fila mai uma, tanba ho to’os ne’ebé maka sira halo bele sustenta familia uma laran. eni

Jornal Nacional