Estranjeru Iha Direitu Sai Sidadaun TL

DILI - Sidadaun estrangeiru sira neebe liu ona ezame husi Diresaun Nasional Registu Notariadu (DNRN) iha ona diretu hanesan sidadaun Timor-Leste, no iha mos dever hodi kontribui ba dezenvolvimentu rai ida nee.

Tuir Ministru Justisa Ivo Valente katak, sidadaun estrangeiru sira neebe liu ona husi ezame ida nee iha ona diretu hanesan sidadaun Timor-Leste, maibe tenki iha mos dever hodi kontribui ba dezenvolvimentu rai ida nee.

Hau lori estadu nia naran, fo parabens no benvidu ba imi nain 66 neebe mai husi nasaun oi-oin, ohin sertifikadu sai hanesan sidadaun Timor-Lest. Ohin ba oin imi mos iha ona diretu hanesan sidadaun ba rai ida nee nian, maibe imi mos tenki iha mos dever atu kontribui ba rai ida nee tanba hanesan imi hotu hatene katak nasaun foin ukun tinan 10 resin, presiza ita hotu nia kontribuisaun,” hatete Ivo iha diskursu serimonia entrega sertifikasaun nasionalidade Timorense ba sidadaun estrangeiru, Sesta (09/10/2015), iha sentru formasaun Judisiariu Caicoli, Dili.

Ivo hatutan, karik iha entre sidadaun foun sira nee balun iha hanoin diak ruma, fahe mos ba sidadaun Timor oan sira seluk hodi oinsa bele iha hanoin neebe diak dezenvolve rai ida nee, tanba rai nee ba oin presiza ema hotu nia kontribuisaun.

Iha biban nee Diretora DNRN, Maria do Rosario Fatima hatete, ohin sidadaun estrangeiru hamutuk 66 mak simu sertifikadu hodi sai sidadaun Timor-Leste. No sidadaun 66, nain 6 mai husi sidadaun estrangeiru ho naturalizasaun no 60 hau husi kazamentu nian. Entre sira nee balun hela tinan 10 iha Timor-Leste no balun fen ka laen kaben ema Timor-Leste no hela iha Timor liu ona tinan 5. Sira mos hatene lian ofisial hanesan Tetum ho Portugues no konhese mos istoria no kultura Timor nian. Sira neebe ohin simu sertifikadu nee, sidadaun estrangeiru sira hela iha munisipiu sira no sira tuir ona ezame iha tinan kotuk no ohin simu sertifikadu nee no sidadaun sira nee balun mai husi Indonesia, Portugal ho nasaun balun tan. Informasaun kompletu iha STL JOrnal no STL Web, edisaun Sabado (10/10/2015). Domingas Gomes

Suara Timor Lorosae