BUP APOIA PR TAUR

Partidu koligasaun Bloku Unidade Popular (BUP) apoia total mensajen Prezidenti Republika (PR), Taur Matan Ruak nian, ne’ebe aprezenta faktu povu nia terus ho sofrementu iha pelnaria Parlamentu Nasional (PN), foin lalais ne’e.

Komisariu Politika BUP Munisipiu Baucau, Alarico Daitula, fo sasin katak, mensajen PR Taur nian ne’e la’os politiza situasaun no halo defamasaun, maibe PR Taur aprezenta realidade no sofrementu povu nian durante ne’e.

Alarico fo sasin katak, durante ne’e povu hein hela lider ida atu mosu mai sai duni matan, tilun no ibun povu nian. Ne’e hatudu duni husi mensajen PR Taur Matan Ruak nian hodi koalia ba orgaun Ezekutivu ho Legislativu atu bele tau atensaun ba povu nia halerik no sofrementu.

“Los duni Taur Matan Ruak sai Prezidenti Republika sai mos matan, tilun no ibun ba povu kiak no povu iha timor laran tomak, tamba ne’e matebian sira la toba, hodi ezizi nia para bele hamrik hodi defende povu ida ne’e nia integridade no nia dignidade,” hataten oan mane Saudozu Sub Xefi Estado Maior FALINTIL, David Alex Daitula hodi responde jornalista sira iha Dili, Segunda (7/3/2016).

Nia hateten, Prezidenit Repulbika iha dever moral no dever politika atu sai duni fontes ba povu ki’ik no ki’ak sira nia sofrementu ba orgaun ezekutivu ho legislativu, atu utiliza osan Estadu nian ba duni interese povu. La’os ba deit interese grupu, amigo, camarada no familia.

Relasiona ho mensajen PR Taur nian ne’ebe Bankada Parlamentar CNRT ho FRETILIN konsidera halo defamasaun ba fundador nasaun Mari Alkatiri ho Xanana Gusmão, tanba deihan familia Alkatiri ho Xanana maka previlizu liu iha ukun rasik an ida ne’e, Alarico Daitula hateten, situasuan ida ne’e realidade duni no prezidenti la halo defamasaun.

“Se ida ne’e sira kestiona dehan la iha faktus, hau hanoin orgaun sira nebe kompetenti tenki hare ba asuntu auditoria sira ne’e tenki funsiona sira nian funsaun para ita bele detekta ou deskobre kona ba mensagen Prezidenti nian ba povu, se sira kestiona dehan katak ne’e defaktu, ne’e injustu entaun mak ne’e ita halo audit i povu mos prontu atu apoiu, hamrik hodi halo audit, semak aset barak liu iha Estadu ida ne’e, se mak asina kontratu projeitu barak liu kona ba projeito konstruksaun sivil iha nasaun ne’e,” afirma Alarico Daitula.

Tuir Alarico Daitula, hirak ne’ebe deskorda dehan PR Taur nia mensajen ne’e la balansu no la iha faktu, tanba sira simu duni benefisiu.

Nia hatutan politiku nain komesa ona tantu iha Parlamentu Nasional (PN ) iha Governu komesa hanesan ema balun hatete dehan atu husu dialogu.

“Hau hakfodak teb tebes kuandu hau rona politika nain sira hakarak husu dialogu ho PR Taur. Tuir lei artigu 86 nebe fo dalan ba Presidente de Republika, mai hanesan Presidente da Republika laos hanesan pesoal Taur Matan Ruak, mensagen ida ne’e ba povu ba nasaun, se hakarak husu dialogu bele dialogu, mais pesoal hau nian, hau hakarak mak ida ne’e sira nebe kestiona kona ba desisaun Presidente nian inkonstutional ne’e hau hakrak Tribunal Rekursu fo sai tiha inkonstitusionalidade karik povu tomak hatene. Se lae, ema bele manipula no politiza situasaun sira hanesan ne’e,” hateten Alarico.

Se desizaun Tribunal Rekursu nian maka legaliza desizaun PR Taur nian ne’e konstitusionalidade, Alarico hateten, Governu ho Parlamentu, liu-liu Bankada FRETILIN ho CNRT tenke responsabiliza konstitusionalidade.

“Hau hein katak Tribunal Rekursu sei fo sai legalidade kona-ba PR Taur nian desizaun ba Xefi Estado Maior foun,” hateten Alarico Daitula. nes/mia

Jornal Naciona