DEVE FO RISKU BA NASAUN

Diretor Luta Hamutuk Mericio Akara hatete, Governu oras ne’e dadaun tau risku ba nasaun Timor Leste, tanba deve ne’ebe mak Estadu halo maka’as tebes.

Akara dehan, oras ne’e dadaun fundu mina rai mos tun ba bebeik Estadu la iha osan atu selu ona nia garantia mos la iha, entaun Timor iha risku ba tusan.

‘’Ita nia income la dun iha ho fundu mina rai ne’ebe tun, Governu buka dalan fasil liu mak deve, agora deve ne’e garantidu ida mak fundu mina rai, maibe agora ne’e fundu mina rai menus, kitan mos la produs ona, aban bainrua tempu ona atu selu ita osan la iha, ita nia nasaun ne’e sei krize at liu no risku makas tebes,’’dehan Akara ba jornalista sira iha Farol, Kuarta (23/03/2016).

Tuir Akara katak, ukun nain sira la fo atensaun ba asuntu ekonomia ne’e, sira preokupa liu mak politika partidu, interese grupu nian no individual nian hodi hetan kadeira liu-liu eleisaun ba tinan 2017.

Nia mos sublinha katak, povu sei la hetan buat ruma husi politika ne’e, povu presiza loron ida han dala tolu, asesu ba edukasaun, saude no infrastrutura hodi moris prosperidade.

Akara afirma tan, karik ukun nain sira mak preokupa liu politika hodi benifisiu ba sira nia an mak iha future fundu mina rai la iha ona Timor Leste sei hasoru krize.

‘’Agora ne’e ita seidauk selu deve sira ne’e, ita sei prepara an hela rai osan, aban bainrua to tempu mak ita selu, maibe ita nia problema mak agora ne’e ita ladun iha returno domestika, ita depende deit ba fundu mina rai, maibe ita nia fundu mina rai rasik agora hahu menus, karik to tempu atu selu mak ita osan la iha, Timor atu sai oinsa los,’’tenik Akara. nia

Jornal Nacional