KONTENTOR 2 LAKON DESKONFIA KILAT HO DROGA

Komandante Jeral Polisia Nasional Timor Leste (PNTL), Komisariu Julio da Costa Hornay informa, kontentor rua (2) lakon iha Portu Dili, fulan Outubro tinan 2015 ne’e deskonfia Kilat ho Droga mak iha laran.

“Iha informasaun dehan Kilat ho Droga mak iha laran, mas sei hein delegasaun kompetensia husi Ministeriu Publiku hodi investiga informasaun ne’e lo’os ka lae,” Komandante Jeral PNTL, Komisariu Julio da Costa Hornay, relata asuntu ne’e ba Jornalista sira iha ninia knar fatin, Caicoli-Dili, Kuarta (02/03/2016).

Nia hatutan, kazu ne’e sedauk iha delegasaun kompetensia husi Ministeriu Publiku (MP), maibe oras ne’e dadauk polisia buka tuir hodi bele hatene se mak apoiu husi kotuk hodi bele prosesa tuir lei.

Hatan konaba oras ne’e dadauk polisia asegura hela kontentor rua ne’e, nia hatete sedauk iha informasaun husi parte polisia investigasaun nian asegura hela ka la asegura.

Iha opurtunidade ne’e, nia informa mos konaba serveja illegal Crocodile kontentor 5 ne’ebe tama iha Timor Leste responslave ba serveja crocodile Tribunal Distrital Dili aplika ona Termu Intidade Rezidensia (TIR).

Konaba nain lolos ba serveja illegal ne’e, nia informa kompania nain ne’e sei iha estrangeiru wainhira sira mai sei lori sira ba prosesu.

“Wainhira ita hetan ona suspeitu sira ne’e ita lori ba prosesu Tribunal, portantu Tribunal aplika ona TIR ba responsalve Cerveja Crocodille ne’ebe iha Timor,”haklaken Julio Hornay. Eus

Jornal Nacional