Sempre Mosu Dizentendimentu Entre Rui-Emilia Iha MF

DILI - Durante asume kargu nudar Vice Ministru iha Ministeriu Finansas, testamunha Rui Hanjam sempre hetan limitasaun ba nia kargu. Nunee sempre mosu dizentendimentu entre nia ho arguida Emilia Pires.

Liu husi audensia julgamentu tribunal kontinua rona dekarasaun husi testamunha Rui Hanjam katak, iha 2011 no 2012 nia nudar Vice Ministru iha MF. Nia iha konesementu kona proposta husi Ministeriu Saude (MS) kona ba fundu kontigensia, neebe momentu nee eis ministra Emilia iha hela rai liur. Nunee proposta nee debate duni iha Konsellu Ministru (KM), nunee nia ho arguida Madalena Hanjam mak halo duni pedidu nee ba iha Primeiru Ministru Xanana Gusmao no ikus mai hetan mos despaisu husi PM.

Iha tempu neeba MS hatoo sira nia kestaun barak konaba alimentasaun no ekipamentus  liu husi KM. Neemak hau ho eis ministra MS mak halo duni pedidu nee ba iha PM, no PM halo despaisu mai iha MF hodi halo despaisu ba iha fundu kontijensia nee. Depois nia prosesu ba oin hau la akompania ona, tanba momentu hanesan vice hetan limatasaun barak husi ministra Emilia tanba la fo konfiansa. No nia fo liu konfiansa ba iha direitur geral,” deklara eis Vice Ministru MF Rui iha TDD, Mandarin, Dili, Segunda (21/03/2016).

Nia hatutan, depois fila husi liur mai Emilia limita nia husi prosesu nee hanesan vice no fo konfiansa liu ba iha direitur geral MF no tekniku sira. Tanba durante asume kargu hanesan vice, nia sempre iha dizentendimentu ho ministra bainhira mosu buat balun neebe lao lalos iha ministeriu nia laran. Ho ida neemak iha prosesu nee, depois halo pedidu nia hanesan vice labele akompania prosesu nee too remata.

Ba Tribunal sasin nee esplika tuir nia servisu nudar vice iha momentu neeba mak fo ajuda ba ministra hodi halao knar neebe mak iha lei organika RDTL nian. No tau matan mos ba iha reseitas iha Alfendega.

Eis Ministru nee afirma, wainhira governu atu naksobu nia konsege realiza inkontru ho diretur sira. Nunee nia mos husu tuir prosesu kazu nee ba iha diretur kooperativa nian katak prosesu kama sira nee oinsa. Neemak diretur nee hatete kama sira nee laos distribui deit ba iha MS maibe ba mos iha Canossa. Iha nee ho laran susar nia dehan ba diretur nee katak, nusa mak fundu kontogensia nee ba iha ministeriu ida maibe tanba sa mak tenke ba fali iha fatin seluk. Dala ruma buat balun lalos ona iha prosesu nee. Informasaun kompletu iha STL Jornal no STL Web, edisaun Tersa (22/3/2016). Domingas Gomes/ Joao Anibal

Suara Timor Lorosae