XANANA TENKI HAKUAK PARTIDU JERASAUN FOUN

DILI - Eis Prezidente  Repúblika, Dr. José Ramos Horta hatete, Kay-Rala Xanana Gusmão nu’udar fundadór CNRT (Cogresso Nacional da Reconstrução de Timor) no mós fundadór nasaun tan ne’e tenki hakuak Partidu Demokrátiku (PD) nu’uda partidu jerasaun foun.

“Ha’u hanoin ida ne’e avo Xanana maka tenki haree tanba partdiu CNRT ho PD ne’e hanesan fén no laen. Agora, labele so’e  arbiru tiha maibé tenki túr didi’ak hanesan fén-laen, oan,  maun no alin tanba PD ne’e joven  no jerasaun foun. Ne’eduni, maun Xanana nu’udar fundadór ba nasaun ida ne’e loloos ne’e tenki hakuak, maibé PD mós tenki túr iha partidu PD nia laran para hadi’a uma laran,” Horta dehan ba jornalista sira iha salaun Delta Nova, Dili, Sábadu (02/4), relasiona ho problema fahe malu iha bloku entre CNRT no PD.

Horta tenik problema ida ne’e balun hakfodak maibé ida ne’e normál no PD partidu ida ne’ebé maka tinan sanulu resin ona no iha munisípiu sira mós la’o nafatin ba oin. Tanba ne’e, nia  hanoin katak laiha problema. Maibé, tuir nia katak di’ak liu sira (PD) kontinua iha governu kuandu PM Rui hakarak. Labele so’e  malu sé lae falta de’it tinan ida muda ministru tama sai atraza liu-tan ezekusaun orsamentu jerál estadu.

“Ha’u hanoin ita nia maun Xanana ne’ebé maka hanesan ita nia avo polítiku ida tanba katuas loos ona iha lideransa no idade mós besik tinan hitu nulu ona. Ne’eduni, hanesan fundadór ba nasaun ida ne’e labele hatete  fali lakohi ko’alia ho PD jerasaun foun. Ne’eduni, ha’u hatete  ba maun Xanana túr hakmatek bolu nia oan PD koalia para haree oinsá atu ajuda PD hodi hadi’a uma laran no oinsá sira hamutuk kaer lia ukun ba oin tanba falta de’it tinan ida ho balun di’ak liu lalika so’e  malu,” nia haklaken.

Direitu Divórsia PD

Dau-daun ne’e partidu CNRT la konta ona ho Partidu Demokrátiku (PD) iha Bloku Governu Koligasaun (BGK), tan ne’e tuir Prezidente  Partidu Demokratiku Cristão (PDC), António Ximenes katak ne’e CNRT nia direitu.

“Politisi ninia xave maka estratejia. Ne’eduni, partidu ne’ebé forma governu, primeiru partidu ne’ebé manán eleisaun, nia maka maka CNRT. Partidu CNRT iha direitu atu halo estratejia ba ninia governasaun,” nia informa ba jornalista sira iha Vila-Verde, Sábadu (2/4).

Nia hatutan agora CNRT hasai PD hosi governu, dalan úniku ne’ebé PD halo maka tenke organiza án, buka haka’as án atu bele manán iha eleisaun jerál 2017 para bele forma governu, sé povu fó lejitimasaun.

“Agora CNRT hasai sira, partidu sira ne’e rasik tenke esforsa án. Ne’e hanesan esperiénsia ba sira para sira bele ukun fila fali kaer governu iha 2017, sé povu fó lejitimasaun,” eis deputadu ne’e sujere.

Entertantu, karta divórsiu CPN partidu CNRT haruka ba Partidu Demokrátiku (PD) iha loron 11 fulan Marsu. Karta CNRT nian PD responde hikas iha loron 22 fulan Marsu.

Prezidente  Bankada Partidu Demokrátiku (PD), Maria Lourdes Bessa esplika katak karta ne’ebé haruka ba CNRT iha pontu rua maka importante. Ida maka PD simu desizaun ne’ebé hola hosi CNRT no ida maka diálogu.

“Diálogu ne’e prinsípiu Partidu Demokrátiku nian. Kona-ba asuntu sira seluk PD sempre buka dalan diálogu atu rezolve buat hotu. La dehan ita atu husu buat ruma, atu muda buat ruma maibé ko’alia. Ita hamutuk ka la hamutuk ita hotu rai ida de’it, ita hotu-hotu serbisu ba dalan ida de’it,”Bessa informa ba jornalista sira iha Parlamentu Nasionál, Kinta (31/3).

Kona-ba PD simu desizaun divórsiu ho CNRT, Prezidente  PN Interinu, Aderito Hugo da Costa, ne’ebé reprezenta partidu CNRT hatete , pozisaun hanesan ne’e fila ba prosesu internál partidu ida-idak nian.

“Prosesu internál ne’e saida maka akontese. Prosesu internál hosi konjuntura polítika foun hanesan ne’e refleta iha Parlamentu Nasionál depois refleta iha kompozisaun governu nian. Tan ne’e maka prosesu ne’e la’o hela, ita hein de’it to’o iha tempu oinsá kompozisaun iha Parlamentu no mós kompozisaun iha governu refleta konjuntura polítika foun bazeia ba mudansa sira hanesan ne’e,” Hugo esplika.(van/jos)

Timor Post