PROSESU JUSTISA HATARDE PROJETU TASI MANE

DILI - Ministru Petróliu Rekursu Minarai (MPRM), Alfredo Pires haktuir prosesu justisa iha Tribunál ba kazu Kompañia Hyundai maka tarde tan ne’e hatarde projetu boot ihasupply base. Projetu ne’e seidauk la’o tanba sei iha hela parte justisa nia liman.

“Kazu ne’e ita haruka ba Tribunál, tribunál responde maibé sé Tribunál iha dezafius balun iha ne’ebá, ita tenke hein to’o rezolve. Agora, laiha prazu ida hatete  katak tenke fulan tolu rezolve ona kazu Hyundai ne’e kuandu iha rekursu ida tama,” Alfredo tenik ba jornalista iha sira Palásiu Governu, Sesta (01/04).

Maibé, nia dehan, normalmente kazu hotu sempre iha nia prazu. Kuandu Tribunál haruka ba governu sumba tiha vistu, entaun iha prazu to’o loron tenke hatama ona nia rekursu.

“Desizaun ne’ebé maka foti tarde hosi Tribunál, ne’e sempre iha impaktu maka’as ba projetu iha supply base, tanba projetu ida ita hakarak la’o, maibé la la’o. Ne’e iha impaktu oi-oin mai ita. Ne’e maka sistema legál ita nia prosesu sira,” Alfredo haklaken.

Tuir kontratu ne’ebé maka asina, nia esplika, kompaña labele book lai buat ida tuir vistu ne’ebé maka iha. Sé book karik, ne’e kompaña nia responsabilidade, tanba governu hatene ninia prosesu ne’e oinsá. Tan ne’e, parte ida-idak maka tenke foti nia medidas.

Alfredo hatete  kazu Hyundai to’o agora sei nafatin hela iha Tribunál nia liman. Agora, governu halo rekursu maibé hatene katak iha Tribunál juis seidauk sufisiente, tanba ne’e maka prosesu ba kazu ne’e sei iha Tribunál.

“Kona-ba kazu Hyundai, ne’e pilár sira hotu tenke hala’o ninia serbisu. Ne’ebe, parte governu nian maka halo rekursu no parte jusitisa ninian maka oinsá atu haree ba kazu ne’e hodi prosesa la’o oinsá.(gus)

Timor Post