TRIBUNAL JULGA EIS ADMINISTRADOR INVOLVE FAMILIA IHA PROJETU

DILI - Funsionáriu na’in hitu (7) ho Eis Administradór Munisípiu Ermera, Victor dos Santos hasoru tribunál, tanba involve família hodi hetan Projetu Dezenvolvimentu Distritál (PDD).

Tribunál Distritál Dili  (TDD), Kinta (31/03),  kontinua hala’o audénsia julgamentu ba kazu partisipasaun ekonomia no abuzu poder, tanba arguidu involve família ba projetu governu.

Arguidu na’in 8 maka, Victor dos Santos nu’udar eis Administradór Munisípiu Ermera, Elvino dos Santos, Joaquim  ho sira seluk tan.

Iha audénsia julgamentu rona sasin, sasin Lucas Salsinha nu’udar emprezáriu Ermera informa,  projetu Dezenvolvimentu Distritál (PDD)  realiza iha tinan 2010.

Momentu ne’ebé anunsia, nu’udar emprezáriu Ermera-oan, entaun kompañia mós ba sosa dokumentus tender hodi tuir tenderizasaun.

Depois sosa dokumentus tenderizasaun, nia rasik, priense rekezitus ne’ebé anunsia iha tenderizasaun taka iha edifísiu Admistrasaun Munisípu Ermera nian, hodi entrega ba Ekipa Konjunta Distritál (KDD) ne’ebé xefia hosi eis Administradór Munisípiu Ermera, Victor dos Santos nu’udar mós arguidu.

Maibé bainhira rejultadu tenderizasaun ba projetu TDD ne’e sai, kuaze arguidu na’in 7, inklui arguidu Victor  dos Santos nia família sira nia kompañia maka manan iha projetu PDD ne’e.

“Ha’u nu’udar Ermera oan, ha’u koñese sira. Maske kompañia sira manan, ne’e la’ós Diretór maka arguidu sira, maibé sira nia família rasik hanesan fen ho oan mane maka sai diretór kompañia,” Deklara sasin iha audénsia julgamentu iha Tribunál, Kuarta (31/03).

Nia afirma, pior liu tan, kompañia sira manan projetu la priense kritéria  ne’ebé ekipa sira anúnsia, hanesan laiha edifísiu, ekipamentus, tanbá  involve arguidu sira iha ekipa tenderizasaun hodi fó manan ba sira nia família.

“La sente satisfeitu ho arguidu sira nia hahalok, sasin ho nia kolega sira lori prosesu justisa hodi mai buka lia-loos, nune’e bele evita problema refere labele akontese  iha futuru mai,”sasin ne’e deklara da tribunál.

Nune mós, sasin  Adolfo Martins  nu’udar Diretór Kompañia Ainapa iha nia deklarasun katak,  nia manan duni projetu PDD iha munisípiu Ermera tinan 2010, tanba  nia projetu priense kriteria ne’ebé ekipa sira anunsia.

“Ha’u manan projetu ne’e, tanba ha’u nia kompañia priense kriteria sira ekipa anunsia hanesan osan US50, edifísiu, ekipamentu pezadu, kona -ba kompañia sira seluk, ha’u la hatene,” deklara sasin ne’e.

Enkuantu Investigador hosi Komisaun Antí Korupsaun (KAK), Júlio da Costa  deklara iha Tribunál katak, momentu nia maka halo investigasaun ba komapañia sira, maibé kompania sira ne’e maoria laiha edifísiu inklui ekipamentus pezadu.

“Ha’u maka investiga kompañia sira duni, maibé maoria kompañia sira  la priense kriteria sira ekipa mensiona, tanba laiha ekipamentus pezadus, edifísiu,” dekala Investigadór KAK ne’e ba tribunál.

Tuir akuzasaun hosi Ministeiru Públiku , kondena arguidu na’in 8 komete krimi partisipasaun ekonomia de negósiu, tanba   aprova projetu PDDI ne’ebé realiza iha Munisípiu Ermera tinan 2010 ba sira nia família rasik.

Ho hahalok arguido na’in 7 nian, Ministériu Públiku konsidera sira komete krimi abuzu poder no partisipasaun ekonomia  de negósiu, hodi aproveita sira nia poder benefísia ba sira nia família.

Audénsia julgamentu ne’e prezide hosi  Juiz Koletivu, José Maria de Araújo, Zulmira Auxiliadora,  Ministériu Públiku Reprejenta hosi Prokuradór Gustavo, no arguido sira hetan asisténsia legál hosi Defensor Públiku, Marcal Mascarinhas. (max)

Timor Post