LICA-LICA OKUPA POSSISAUN 3 IHA GRUPU ‘B’ HAFOIN FÓ DEROTA 1-0 BA NAGARDJO

Segundu divizaun jogu kampionatu Liga Futebol Amadora (LFA) Timor Leste, Lica-Lica Lemorai FC okupa possisaun tolu (3) iha grupu ‘B’ hafoin fó derota ba ekipa Nagardjo FC ho score 1 á 0 liu husi kontra atake ne’ebé hala’o iha Stadium Munisipal Dili, Kuarta (30/03/2016)

Hahu árbitu lian iha kampu laran ba ekipa rua komesa jogu primeira parte, ekipa jogadores sira halo kontra atake ne’ebé másimu tebes hodi defende ba kada klube klube futebol ne’ebé mak sira hola parte ka involve durante jogu no situasaun kontinua rame iha jogu segundu parte.

Maibe ho esforsu máximu husi jogadores ekipa Lica-Lica Lemorai FC halo, uniku golu Dino Billy liu husi suta penalidade iha menutu 61, konsege lori nia ekipa Lica-Lica Lemorai ba-dahuluk hetan pontus tolu iha jogu ba-daruak kuntinuasaun jogu segundu divizaun kampionatu LFA epoka 2015/2016.

Golu husi jogador suplenti ne’e lori mos Lica-Lica FC provizoriamente okupa terseira klasifikasaun Grupo ‘B’ ne’ebé mak oras ne’e lidera husi ekipa Assalam FC.

Hafoin de jogu Treinador Lica-Lica FC, Claudinho Cardoso ba jornalista sira, senti kontenti no orgulho ba esforsu máximu ne’ebé mak nia jogador sira halo hodi bele hetan primeira vitoria ida ne’e. “Masque iha jogu ba-dahuluk ami lakon ho ekipa Assalam FC, maibe iha jogu ba-daruak ne’e ami konsege sai husi presaun hodi bele manan jogu,” realsa nia.

Treinador Claudinho relasa liutan, parte husi ami nia ladun satisfas ho árbito ne’ebé mak lidera jogu ne’e, tanba hare sei iha failansu barak ne’ebé mak seidauk bele melhora.

“Ami hein iha jogu tuir mai ne’e, parte árbitru bele melhora-àn i liliu ba komisaun organizadora hodi bele haree asuntu prinsipal ne’e,”

Enkuantu jogador kapitaun ekipa Marito Guterres mós sente kontente no prmete katak sei kontinua haka’as-àn atu iha jogu hirak tuir mai bele jogu diak liu tan hodi bele hetan rezultadu ne’ebé disk.

Nune’e mós treinador Nagardjo FC, Juliao Monteiro hateten, “Ami simu rezultadu ne’ebé mak iha, maske ami lasatisfas ho desizaun husi árbitu ne’ebé mak ami senti merugikan ba ami nia ekipa.

“hau atu dehan deit katak, ami nia jogador sira hatudu duni sira nia jogu maibe ami lakonsege aproveita oportunidade ne’ebé mak ami hetan hodi halo golu, no situasaun ida ne’e konsege aproveita husi jogador Lica-Lica Lemorai FC,” akresenta nia.

“Masque ami nia ekipa derota maibe ida ne’e laós jogu badala ikus, tanba husi jogu hat ne’ebé mak sei iha, entaun ami sei haka’as-àn atu bele manan, ida ne’e dalan ne’ebé mak ami tenke hala’o sei karik hakarak kompete atu avansa ba primeira divisaun.” Dehan nia. Ito

Jornal Nacional