Konsellu Superior Defeza timoroan seidauk iha solusaun ba lideransa militar

Reuniaun iha loron-kuarta hosi Konsellu Superior Defeza no Seguransa (CSDS) timoroan nian hotu lahó solusaun ida ba prosesu susar kona-bá tranzisaun iha lideransa iha forsa sira defeza ne'ebé dura fulan barak nia laran.

Fonte sira hosi Governu ho Prezidénsia, ne'ebé Lusa hasoru, konfirma ona katak reuniaun, ne'ebé dura oras rua resin, hotu lahó konkluzaun sira kona-bá Konseitu Estratéjiku Defeza no Seguransa Nasional (CEDSN) nian, ne'ebé debate hela iha fulan hirak nia laran no fila fali ba ezekutivu.

Tuir dalan ofisial, Prezidénsia Repúblika no mós Governu la halo komentáriu ba konteúdu enkontru iha loron-kuarta ne'ebé tema dominante maka lideransa hosi forsa defeza (F-FDTL) nian, prosesu ne'ebé adia beibeik hahú hosi fulan-Outubru tinan liubá no hamosu deskontentamentu entre veteranu sira no opiniaun la hanesan entre Governu ho Prezidénsia Repúblika.

Hahú hosi fulan-Setembru liubá, bainhira hakotu mandatu sira hosi komandante atuál sira F-FDTL nian, Prezidente Repúblika Taur Matan Ruak fó sai tiha ona desizaun rua maibé la aplika desizaun ida.

Desizaun sira ne'e sai hanesan polémika, ida tanba Governu hatete katak Prezidente la liga sira nia proposta no ida seluk tanba laran la ksolok ne'ebé mosu iha komando F-FDTL nian entre veteranu sira luta hasoru okupasaun indonéziu.

Jornal timoroan ida, Independente, hatudu ona iha nia manxete iha loron-kuarta katak desizaun final maka manutensaun hosi lideransa atuál, proposta uluk hosi Governu no ne'ebé maka Prezidente Repúblika rejeita.

Desizaun dahuluk hosi Taur Matan Ruak, iha loron 09 fulan-Fevereiru, maka hasai Lere Anan Timur hodi promove brigadeiru-jeneral Filomeno da Paixão de Jesus, hanesan númeru daruak, hodi troka nia.

Desizaun ne'e la konkretiza tanba kontra proposta hosi Governu - ne'ebé defende aumentu hosi mandatu sira na'in rua nian - hamosu tensaun entre Prezidénsia, ezekutivu ho parlamentu. Governu aprezenta tiha ona rekursu hanesan ba Tribunal Rekursu maibé rejeitadu.

Iha fulan-Marsu, Taur Matan Ruak simu ona hosi Governu proposta foun ida, hodi nomeia kapitaun-tasi-no-funu nian Donaciano Gomes (Pedro Klamar Fuik) nu'udar Xefe Estadu-Maior Jeneral hosi Forsa Armada sira nian (CEMGFA) no koronel Calisto dos Santos (Coliati) nu'udar visi-CEMGFA.

Desizaun hamutuk ida hosi Governu ho Prezidénsia ne'ebé marka ona "tranzisaun jerasional" ida kompletu iha F-FDTL, maski Taur Matan Ruak insisti katak nia hakarak "tranzisaun ida gradual liu".

Hahú hosi komunikadu sira ne'e, ho loron 15 fulan-Marsu, Governu no mós Prezidénsia avansa ona ho informasaun seluk kona-bá aplikasaun hosi desizaun ne'e.

Prezidénsia hatete katak iha Governu nia liman hodi marka tomada pose no sei publika iha Jornal Repúblika hodi halo ofisial desizaun ne'e bainhira marka tiha loron.

Maibé desizaun sei la simu nafatin iha área oioin, liuliu entre veteranu sira no iha komando atuál F-FDTL rasik.

SAPO TL ho Lusa – Foto: EPA@ António Dasiparu