VISITA SUKU BUKA VOTUS…?!

Jornal Nacional, editorial

Air susu dibalas dengan air tuban, kebaikan dibalas dengan keburukan, palavras  Melayu nee merese sai husi Presidente Republika, Taur Matan Ruak ba ema sira nebe kritika programa Presidente Republika nian hodi visita sukus 442 iha teritoriu Timor laran tomak.

Progama Presidente Republika nian konaba vizita suku nee besik konklui ona, maibe ikus mai mosu kritika katak programa visita suku gasta deit osan no buka votus tamba eleisaun komesa besik dadaun ona.

Lafasil lao perkore sukus 442 iha timor laran tomak iha fulan 60 nia laran, hodi halao misaun lori Presidente Republika, Taur Matan Ruak atu dada besik Estadu ba povu, hakbesik povu ba Estadu, hodi haree no rona diretamente povu nia moris realidade iha baze, relasaun ho impaktu husi dezenvolvimentu ne’ebé hala’o iha rai laran.

Presidente Republika tama sai suku no aldeia, tun foho no sae foho, lao iha loron manas, rai malirin laran lasuran kolen maibe advesariu politiku sira sempre kontinua buka pontu fraku atu bele esplora.

Visita suku sira nee nudar komitementu politika Presidente Republika iha serimonia tomada de posse 20 de Maiu iha Tasi Tolu nebe hatete katak nia sei visita suku sira iha timor laran atu bele rona povu nia lian, no hakbesik estadu nee ho ninia sidadaun sira reduz visita ba estranjeirus no intesiva visita ba distritu.

Nudar sidadaun, ita senti orgulhu tamba ita iha lideransa ida nebe hadomi povu ida nee no hakarak povu ninia moris diak maske mosu lia fuan konsideresoens oi-oin, buka simpatia no votus tamba eleisaun besik dadaun ona.

“Naturalmente polítika hot-hotu sempre buka votu, laiha polítika ida ke la buka votu. Ha’u uluk kandidatu, primeiravez ha’u nia vida mai polítika, ha’u buka votu, i sira (povu) mak hili, ha’u la’os obriga sira, povu la’os matan delek, nia hili ema ne’ebé nia gosta, la’os hili ema ne’ebé nia hakarak,” Taur Matan Ruak.

Los duni senhor, politika hotu – hotu hakarak buka simpatia no buka votus, laiha politika ida iha rai ida nee mak labuka votus, diak liu lalika bosok an, honestu deit, visita suku atu esplika prosesu desenvolvimentu iha pais nee.

Ho vizita PR Taur Matan Ruak nian ba sukus, atu dada besik Estadu ba povu, hakbesik povu ba Estadu, hodi haree no rona diretamente povu nia moris realidade iha baze, relasaun ho impaktu husi dezenvolvimentu ne’ebé hala’o iha rai laran.

Taur Matan Ruak nudar sidadaun iha direitu atu harii Partido, halao aktividade partidaria naran katak labele ultrapasa limite sira nebe governu tau, maibe nudar Presidente Republika aktivu konstituisaun proibe atu iha partido, kontra konstituisaun.*