ASEAN Presiza Aprende Umanisme ho TL

DILI, (ANTIL) – Organizasaun Nasaun sira hosi Sudeste Aziatiku (ASEAN) presiza aprende ho Timor-Leste kona-ba valór umanisme, tanbá TL la-aplika kastigu mate (pena morte) ba sidadaun ne’ebé mak viola lei.

“Demokrasia iha Timor-Leste hatudu duni kumprimisiu iha implementasaun, tanba tane a’as direitus umanus, nune’e la-aplika pena de morte, ida ne’e nasaun sira iha ASEAN presiza banate tuir”, Daniel Anigra nuudar Programa Manager Human Rights Working Group indonézia ba jornalista ANTIL iha sentru Konvensaun Dili, Kinta, (4/8).

Alende Indonézia, Daniel dehan, nasaun ASEAN sira seluk sei aplika pena morte ba nian sidadaun.

Tuir nia, TL merese atu integra-án ona iha ASEAN. “Jeografikamente Timor iha teritoriu Sudeste Aziatiku, nasaun sira tenki simu ona Timor atu tama AZEAN, aspeitu sel-seluk tama tiha mak foin haree tuir tan”, Daniel sujere.

Hodi dehan tan, kriteria tama ASEAN haree ba sosiu polítiku, ekonomia no seguransa defesa la’os sai barometru

hodi sukat integrasaun ba TL iha ASEAN, tanbá TL fó importansia maka’as ba direitus umanus ne’ebé sai baze ba demokrasia.

Iha oportunidade hanesan mos fotografer Toshi Kazama, ne’ebé iha tinan barak ona hasai foto ba ema ne’ebé hetan kastigu pena morte reforsa, biar TL ki’ak, ki’ik no nakonu ho odiu, tanba ultra-pasa funu mais la rai oxiu, ida ne’e mak nasaun sira seluk presiza banati tuir. Tuir nia, pena morte ne’e rai barak aplika, tanba kestaun odiu.

Nasaun ASEAN ne’ebé ohin loron sei komunga pena morte mak, Brunei Darussalam, Indonézia, Malazia, Singapura, Vietnam, Laos, Myanmar, ho Tailándia. Jornalista : Manuel Pinto - Editora : Rita Almeida

Lee mos iha ANTIL