PM RUI: SIDADAUN HOTU IHA DEVER RESPEITA SÍMBOLU NASIONÁL

Primeiru Ministru (PM), Rui Maria de Araújo fó orientasaun atu buka hatene (investiga), tanba saida mak joven Timor-oan sira ne’e pinta estraga (hakerek buradu),  bandeira RDTL ne’ebé sosa ho ema rihun ba rihun nia isin no ran. Tanba nu’udar sidadaun Timor iha dever-obrigasaun atu respeita símbolu nasionál sira.

 “Forma jeral ne’e ita hanesan sidadaun, ita tenki respeita ita nia simbolu nasionál, i simbolu nasionál sira ne’e, la’os ema ida rua de’it mak tur-tur ba defini simbolu nasionál sira ne’e. Tanba ne’e presiza buka hatene, tanba saida mak sira pinta estraga bandeira ne’e,” dehan PM Rui Araújo ba jornalista sira iha Palácio Prezidénsia Aitarak Laran Dili, Kinta (04/08), hafoin hasoru malu ho PR Taur Matan Ruak.

Xefi Governu ne’e hatutan katak, símbolu nasionál sira ne’e, mai husi prosesu konstrusaun nasaun no Estadu ninian, no mai husi luta libertasaun ne’ebé naruk.

“Tanba ne’e hanesan sidadaun, ita hot-hotu iha dever atu respeita, maibé problema ida akontese ne’e, ita lahatene tanba saida mak buat ne’e mosu hanesan ne’e,” lamenta PM Rui.

Xefi Governu ne’e afirma, Timor-oan hotu, atu joven, adultu ka labarik ki’ik oan, presiza iha respeitu espesial ida ba símbolu nasionál Timor Leste (TL) nian.

“Tanba símbolu nasionál sira ne’e mak reflete ita nia identidade hanesan nasaun no hanesan Estadu, no bandeira ita nia ne’e, hanesan bandeira Estadu seluk nian, sidadaun hotu tenki respeita,” katak Xefi Estadu ne’e.

Alénde ne’e, Komandante Jeral Polisia Nasionál Timor Leste (PNTL), Júlio Hornay mós informa katak, PNTL simu tiha ona informasaun kona-ba aktus juventudi sira ne’e nian.

“Ami sei haruka ami nia ema atu husu tuir informasaun kona-ba, sira nia hanoin pinta bandeira RDTL ne’e oinsa, depois mak ita foin públika,” informa Julio Hornay.

Nia haktuir, polisia seida’uk hatene klaru kona-ba tanba sa mak sira pinta estraga bandeira nasionál RDTL ne’e.cos

Jornal Nacional