Konsellu Seguransa ONU halo votasaun foun kona-ba kandidatu ba sekretáriu-jerál

Konsellu Seguransa Nasoins Unidas iha ohin halo votasaun foun ida kona-ba kandidatu ba sesretáriu-jerál organizasaun nian, hafoin  antigu primeiru-ministru portugés António Guterres mosu hanesan favorito iha  primeira votasaun.

Iha primeira ronda informál, loron 21 jullu iha Nova Iorque, eis-primeiru-ministru portugés hetan  votu enkorajamentu 12 no tolu "sein opiniaun" no lahetan votu kontra iha ninia kandidatura ba lideransa ONU nian. 

Durante iha votasaun, kada ida hosi membru Konsellu Seguransa  15  hatudu sé "enkoraja", "dezenkoraja" ka manifesta  "sein opiniaun" kona-ba kandidatu sira.

Faktu ne’ebé sai desizivu iha eleisaun, tamba  sekretáriu-jerál foun presiza aprovasaun hosi membru permanente lima iha Konsellu Seguransa (Estadus Unidus Amérika, Reinu Unidu, Rússia, Fransa no Xina), ne’ebé iha poder ba veto.

Hosi kandidatu sira ne’ebé maka atu susede Ban Ki-moon, eslovenu Danilo Turk hetan votu apoiu 11 no votu kontra rua.

Hafoin, maka  eis-ministra Negósius Estranjeirus búlgara no diretora UNESCO, Irina Bokova, ho votu enkorajamentu sia no dezenkorajamentu haat.

Tuir kedas Vuk Jeremic, hosi Sérvia, no Helen Clark, hosi Nova Zelándia.

Fatin ikus hela ba iha Miroslav Lajcak, Eslovákia, Susana Malcorra, hosi Arjentina, Christiana Figueres, Kosta Rika, Natalia Gherman, hosi Moldávia, Igor Luksic, hosi Montenegro. Vesna Pusic, hosi Kroásia, ikus liu, ho votu  negativu 11.

Tamba ne’e, kroata Vesna Pusic anunsia iha kinta-feira ne’e katak nia deziste ona, to’o agora nia hanesan kandidata únika  ne’ebé resigna-an.

Organizasaun ne’e iha  esperansa bele hetan iha outonu ne’e susessór Ban Ki-moon, ne’ebé termina ninia  segundu mandatu iha finál tinan ne’e.

SAPO TL ho Lusa