TL Prontu Kompete iha Mundu Internasional

“Atu dehan katak, Timor-Leste prontu atu kompete iha mundu internasional, iha modalidade tomak. SEJD sei esforsu an tomak atu fó atensaun ba jovens sira ne’ebé iha kualidade, maturiedade, no iha kontribuisaun bo’ot ba nia rain rasik”.

Nei-neik, maibé bei-beik. Nei-neik, maibé iha serteza. Timor-Leste illa ki’ik oan ida, ne’ebé hamri’ik iha reziaun sudeste Aziátiku nian. Hanesan nasaun meak (Nurak) oan ida, maibé lakohi lakon oportunidade hodi kompete ho nasaun sira seluk, ne’ebé idade avansadu ona. Liu-liu iha ASEAN.

Ohin loron, iha nasaun sira ASEAN (Association of Southeast Asian Nations), sura mós TL ninia prezensa, no iha mudansa ba área desportu nian, liu-liu futebol. Iha kompetisaun ASEAN University Games (AUG), foin la-lais ne’ebé hala’o iha Singapura, ekipa TL ne’ebé reprezenta, no halo selesaun liu hosi Federasaun Desportiva Akadémika Timor-Leste, hatudu rezultadu di’ak, tanba sai segundu luga (Runer Up), iha kompetisaun refere bainhira lakon ho ekipa jigante Thailándia 0-3.

Maske hanesan segundu lugar, maibé espresa sentimentu kontente hosi sidadaun sira, liu-liu jovens, estudantes no inan-aman sira la lakon. Realidade ne’ebé hatudu maka, iha loron Kinta-Feira (21/07/2016), hafoin ekipa selesaun fila hosi Singapura to’o mai TL.

Iha aeroportu internasional Prezidenti Nicolau Lobato nakonu ho adeptus,  hafoin ekipa selesaun tun hosi aviaun Nam Air iha meiudia tuku ida (13:00) oras Timor-Leste nian, simu kedas hosi Sekretária Estadu Juventude Desportu (SEJD), Interina Veneranda Lemos ho reprezentante reitores sira hosi Universidade hotu, liu-liu Universidade sira iha kapital Díli. No iha biban ne’e mós simu ho lian dadolin tuir lisaun Timor nian. Hafoin ida ne’e, ekipa selesaun akompaña hosi adeptus sira halo karavana hadula kapitál Díli, no taka iha SEJD.

Hafoin simu tiha jogadores sira, SEJD interina Veneranda Lemos liu hosi konferensia imprensa hateten katak, Timor-Leste marka istória ida tan iha área desportiva ninian. Ne’eduni, fó parabens ba federasaun akadémika ninian, no mós  ba universidade iha Timor laran tomak katak, ho sira nia esforsu bo’ot maka bele hetan rezultadu ne’ebé di’ak teb-tebes ita TL.

“Mezmu federasaun ida ne’e foin hari’i iha tinan 2014, federasaun serbisu hamutuk Sekretária Juventude Desportu bele produz buat ne’ebé di’ak teb-tebs ba TL, no juventude hatudu sira ninia kontribuisaun ba dezenvolvimentu desportivas,” dehan Veneranda iha biban ne’ebá.

Nia dehan, povu Timor laran tomak hein hela jovens sira nia kontribuisaun. No ho rezultadu ne’ebé iha la’os atu hatudu katak, medalla sira ne’ebé sira lori mai ne’e maka importante, maibé jogadores sira sai hanesan ajente da paz, no embaixador TL ninian iha rai liur. Ne’eduni, tuir nia TL prontu atu kompete ho nasaun sira iha mundu.

“Atu dehan katak, Timor-Leste prontu atu kompete iha mundu internasional, iha modalidade tomak. SEJD sei esforsu an tomak atu fó atensaun ba jovens sira ne’ebé iha kualidade, maturiedade, no iha kontribuisaun bo’ot ba nia rain rasik,” katak SEJD interina ne’e.

Iha biban ne’e, Xefi delegasaun Timor-Leste ba AUG Jeferino Viegas haktuir katak, AUG ne’ebé hala’o iha Singapura hanesan partisipasaun TL nian ba dahaat (4). Nia informa katak, iha tinan sira ba kotuk, bainhira Federasan Akadémika seidauk hari’i, atividade ne’e organiza hosi SEJD, no hafoin iha tinan 2014 harii federasaun ba kompete iha Palembang Indonézia ne’ebé hatudu rezultadu di’ak uituan tanba TL ladun sofre golu.

Tanba ne’e nia dehan katak, sira nia espetativa ba tinan ida ne’e (2016), antes aranka ba Singapura maka mínimu tenta hatama golu iha futebol nian, tanba iha pasadu nunka hatama golu ida ba ekipa sira seluk ne’ebé sira joga kontra.

Maibé, iha eventu ne’e, akontesse ekipa selesaun ne’e mós konsege mana iha jogu hira hanesan, manan Myanmar ho (5-1), tuir fali derrota hasoru Thailandia ne’ebé full hamtuk iha grupu nian ho (1-3), tuir tan fali maka manan Laos ho (5-2), hodi hakat ba semifinal hanesan runer up, hodi kontinua joga hasoru ekipa Malázia ne’ebé selesaun manan ho rezultadu (2-1). Ho rezultadu ida ne’e avansa ba final, kontra Thailandia ne’ebé hanesan kampiun iha tinan sira ba kotuk ne’ebé lakon ho ekipa ne’e ho (0-3).

Iha biban ne’e, Reitor Universidade Nasional Timor Lorosa’e Francisco Miguel Martins hato’o sentimentu orguillu hodi simu jogadores sira. Nia dehan, universidade haki’ak hosi apetu oi-oin, no estudantes sira mós iha talent oi-oin. Ne’eduni, talent ne’e universidade fó fatin atu bele dezenvolve.(John)

Matadalan