KONFRONTU GAM IHA HERA, EMA NAIN 3 KANEK, SUNU UMA LIMA

Konfrontasaun entre eis Grupu Arte Marsiais (GAM) ne’ebe akontese iha loron Segunda (07/11/2016) lorokraik iha oras 18:00 Otl, entre Aldeia Mota kiik ho Aldeia Halidolar, suku Hera, Postu Administrativu Metinaro, Munisipiu Dili, rezulta ema nai’n tolu (3) kanek no sunu uma 5 (lima).

“Akontesimentu ida horiseik ne’e (horibainruak-red) rezulta uma lima mak hetan estragus sunu inklui motor 3, no vitima nain 3 mak hetan kanek, deskonfia asaltu malu entre grupu arte marsiais, ”Komandante Operasaun Polisia Nasional Timor (PNTL), Superintendenti Xefe Polisia, Henrique da Costa , ba Jornalista iha nia knar fatin, Kuartel Jeral PNTL, Caicoli-Dili, Tersa (08/11/2016).

Nia esplika, uma ne’ebe hetan estragus ka sunu parte polisia kontaktu kedas ba Bombeirus hodi hamate ahi no EDTL hodi hamate elektrisidade ba uma sira ne’ebe hetan sunu.

Iha atuasaun polisia nian ne’ebe lidera husi komandu polisia Munisipiu Dili konsege kaptura ema na’in 8 detein ona iha sela polisia hodi hein prosesu kontinuasaun.

Kazu refere polisia kontinua esforsu hodi kaptura autor sira seluk ne’ebe tempu badak sei hetan mandadu kapturasaun husi Ministeriu Publiku, maske polisia kaptura ona ema na’in 8, ne’ebe husi eis membru Ikatan Kera Sakti (IKS) ema nai’n 1 no ema nai’n 7 husi eis Setia Hati (SH).

Maibe, nia parte la fo sai konaba problema  ne’e ninia motivu ka hun lolos husi akontesimentu nee, tanba parte polisia sei kontinua halo investigasaun  ba kazu ne’ebe refere.

“Agora dadauk sei iha hela prosesu nia laran, ha’u lakohi atu koalia fali buat ne’ebe mak parte investigasaun nian, fo tempu ba polisia investigasaun para bele halo identivikasaun faktores ba kauza ka problemas sira ne’e,”hateten komandante operasaun.

Nia afirma, situasaun atual iha suku Hera dadauk situasaun kondusivu iha fatin akontesimentu, situasaun la’o normal ne’ebe hetan seguransa masimu husi PNTL no hetan mos apoiu husi Bataliaun Orden Publiku (BOP).

Iha biban ne’e nia parte husu ba komunidade hotu tenke kontribui fo informasaun ba polisia, tanba dalaruma buat ne’ebe mak polisia la detekta parte komunidade sira hatene tenke informa ba polisia para bele atua lalais. Eus

Jornal Nacional