DILI,
(ANTIL) – Primeiru Ministru, Rui Maria de Araújo iha ninia mensajen ba
komemorasaun loron masakre Santa Krúz ba dala 25 husu ba povu no juventude atu
husik konfrontu pesoál hodi buka solusaun ba dezafiu hotu ne’ebé enfrenta iha
prosesu libertasaun povu.
“Timoroan
ne’ebé banati tuir joven sira 28 Outubru no 12 Novembru no joven sira seluk
hotu ne’ebé entrega sira-nia an tomak ba libertasaun pátria, hakarak husik hela
ninia interese individuál hodi tau a’as liu interese komún ka interese
nasaun nian”, Xefe Governu hato’o iha ninia mensajen ne’ebé ANTIL asesu, foin
lalais ne’e.
PM
hatete, ezemplu korajen no abnegasaun ne’ebé joven 28 Outubru no 12 Novembru
sira hatudu sei nafatin relevante iha prosesu konstrusaun estadu, nasaun nia
libertasaun povu ne’ebé oras ne’e daudaun Timor-Leste hala’o hela.
“Ita
hein katak iha selebrasaun tinan 25 Masakre Santa Krús no loron nasionál
juventude tinan 2016, ita hotu bele hetan inspirasaun, forsa no aten-barani atu
hakarak ba oin, liberta ita-nia povu no lori dezenvolvimentu mai Timor-Leste
laran tomak”, PM dehan.
Lori
governu nia naran PM hato’o parabéns ba joven timoroan hotu ne’ebé dedika
sira-nia án tomak ba libertasaun no halo votu atu joven timoroan sira ohin
loron nian aten-barani hodi partisipa ativamente iha konstrusaun nasaun, estadu
no iha esforsu nasionál atu liberta povu husi mukit no ki’ak. (jornalista:
Maria Auxiliadora; editora: Rita Almeida)
Foto:
Primeiru Ministru, Rui Maria de Araújo. Foto GPM
Sem comentários:
Enviar um comentário