Tribunal hein Vicente Guterres

DILI - Tribunál Distritál Dili (TDD) iha loron 31 Outubru tinan 2016,  haruka tan karta ba Parlamentu Nasionál husu hasai imunidade arguidu Vicente Guterres hodi ba tuir prosesu julgamentu iha tribunál, kona-ba kazu sosa kareta ba deputadu sira iha terseiru lejislatura.

Karta tribunál haruka, bazeia ba karta hosi  Parlamentu Nasionál atu  Tribunál haruka pedidu foun, tan meza  parlamentu foun presiza iha karta foun hodi meza  foti desizaun ba arguidu Vicente Guterres nia imunidade.

Tuir informasaun Timor Post hetan hosi Seksual Prosesual Tribunál Distritál Dili iha loron Segunda (7/11),  pedidu foun ne’ebé Tribunál haruka ba Parlamentu Nasionál ho nia númeru  Nuk 0037/10/PDDIL.

Tan ne’e ho karta foun ne’ebé Tribunál haruka, hein katak  Parlamentu Nasionál sei foti desizaun hasai arguidu Vicente Guterres nia imunidade hodi arguidu ba tuir prosesu julgamentu.

Kazu koruspaun ne’ebé diskonfia arguidu Vicente Guteres komete nia prosesu kleur ona iha Tribunál, maibé prosesu julgamentu seidauk bele la’o, tan Parlamentu Nasionál rasik seidauk hasai arguidu nia imunidade. (max)

Timor Post