Governu Mantein Polítika Deve

DILI - Vise Ministru Finansas (MF), Helder Lopes hatete, governu sei kontinua implementa polítika impréstimu (deve) duké foti osan hosi fundu minarai, tanba impréstimu, selu ho osan funan ki’ik liu.

Helder hatete, públiku sempre kestiona katak bainhira governu impresta osan maka sei fó impaktu ba jerasaun future, maibé publiku mós tenke hatene katak se dada hotu osan fundu minarai mai mak la rai hela osan ba jerasaun futuru, ne’e mós la di’ak.

“Ezemplu de’it ita bo’ot iha osan $100 dolar iha banku hosi osan ne’e tinan ida nia funan iha 3%, entaun osan sa’e ba $103 dolares, agora ita ba impresta $100 depois ita fo fali osan ba ema ne’ebé ita impresta iha $101 dolar, agora ita hakarak uza ita nia osan iha banku ka impresta mak di’ak, haré ba funan ki’ik, entaun ita opta impréstimu, kompara ho ita dada ita nia osan,”haktuir Helder iha MNEK, Pantai Kelapa, Kuarta, (30/11).

Agora ema dehan kuandu governu halo impresta osan tau todan ba jerasaun futuru, imajina took, se governu la halo estrada, la halo ponte no la halo portu, entaun ne’e mos tau odan ba jerasaun foun sira mai.

“Ne’ebé atu tau todan ba jerasaun futuru, ne’e konforme ba ema ida-idak nia definisaun, maibé tuir ami sira ne’ebé servisu iha governu, ami fi’ar katak kuandu hare osan ne’ebé mak baratu ba foti agora hodi mai dezenvolve,” hatete Helder.

Emjeral governu Timor Leste halo ona impréstimu osan besik ba milaun $350. Osan sira ne’e impresta hosi ADB, Banku Mundial, JICA no ida seluk tan.

Prosesu selu ba impréstimu sira, governu hare ba kontratu ne’ebé mak halo ho ajensia sira foti osan ba, se selu banhira de’it governu selu, ne’ebé haré ba kontratu impréstimu de’it. (gus)

Timor Post