PROFILE JOSÉ ANTÓNIO DE JESUS DAS NEVES ‘SAMALA-RUA’ DEFENDE POVU NIA MORIS DI’AK

Tama ona ba loron lima, Kandidatu Prezidenti Repúblika (KAPRES), ba periodu 2017-2022 tun ba baze hodi hasoru ninia eleitores, apoiantes no simpatizantes ne’ebé atu fó sira votus konfiansa iha festa demokrasia 20 Marsu 2017. Sidadaun Timoroan sira ne’ebé iha poténsial hodi konkore ba iha kadeira ema númeru um iha nasaun doben, Repúblika Demokrátika Timor Leste (RDTL) ne’e hamutuk ema na’in walu (8).

Figura na’in walu ne’e mak hanesan , António Maher Lopes ‘Fatuk Mutin’, (1) Francisco Guterres ‘Lu-Olo’ (2), Amorin Vieira, (3) José A. de Jesus Neves ‘Samala-Rua’, (4), José Luis Guterres ‘LUGU’, (5), Maria Ângela Freitas da Silva, (6), Luis Alves Tilman (7) no António da Conceição ‘Kalohan’ (8).

Husi figura na’in 8 ne’e, ida-idak ho sira nian matenek, ho sira nian esperensia, sira nian kapasidade, sira nian abilidade, ne’ebé durante ne’e sira ezerse ona iha tempu rezisténsia to’o mai ukun-an ne’e nia laran.

Husi kandidatu na’in 8 ne’e, ida mak José António de Jesus das Neves ‘Samala-Rua’, ne’ebé hakat ho ninia espíritu ida ne’ebé sempre hafanun no motiva nia hodi kandidata-an, maka konsiente-an nu’udar jerasaun kontinuadora ba lideransa Estadu ida ne’e nian. Tanba ne’e mak José das Neves Samala-Rua kompromete-an defende povu nia moris di’ak, iha país ida ne’e, liu husi ukun di’ak.

José das Neves ‘Samala-Rua’, moris iha 15 Juñu 1962,  iha Suku Poetete, Postu Administrativu Ermera, Munisípiu Ermera.

Samala-Rua, moris iha familia simples n’udar tos na’in, aman Pascoal  das  Neves  no  inan  Maria Carlota  Santa  Florindo.

Ikus mai José António de Jesus das Neves, ne’ebé atinji ona otas mane klosan, koñesidu ho naran Samala-Rua, iha periodu rezisténsia.

Samala-Rua kaben ho Maria Agnes Bere no hetan oan mane ida naran Godofredo alias Doben ho tinan 1. Samala-Rua kaben tinan 51, tanba ninia tempu juventudi dedika liu ba estudus no luta ba Timor-Leste nia ukun-rasik-an. Samala-Rua bei-oan husi dalas uma lisan Rae-Pusa, husi familia simples, klase baixa, ne’ebé bai-bain ema dehan povu nia oan ka Maubere nia oan. Nia aman, Pascoal das Neves, nu’udar karpinteiru no Tenente Segunda Linha iha Tempu Português no Maria Carlota Santa Florindo nu’udar dona da casa ka baibain kaer knaar uma-kain nian.

Samala-Rua moris husi familia to’os na’in, ne’ebé fila-liman ho kafé, buka moris ho kafé folin no familia ne’ebé laran di’ak no amigavel. Nu’udar oan husi familia to’os na’in, hala’o mós moris tuir síklu serbisu to’os-na’in kafé no batar nain, no hetan biban ba aprende husi abilidade no kapasidade ne’ebé aman-inan sira iha.

Samala-Rua tama eskola pre-primária iha Misaun Katólika Ermera tinan 1969 no remata 4ª klase iha tinan 1975. remata Remata 4ª klase Samala-rua la kontinua nia estudu tanba mosu golpe Díli entre partidu União Democrática Timorense (UDT) ho Frente Revolucionária do Timor-Leste Independente (FRETILIN). Iha momentu ne’e Samala-rua iha tinan 13, nune’e wainhira golpe mosu, nia hamutuk ho nia familia iha Vila-Verde ba helik-an iha uma mutin boot ida naran “Assistensia Social” iha Caicoli, agora kampus UNTL funsiona ba. Husi ne’e mak Samala-Rua, asiste rasik kanek no mate tan tiru malu, iha konflitu armadu ida.

Tanba situasaun polítika ne’ebé manas tebes no laiha biban ba eskola ona, Samala-Rua kontinua fali nia eskola iha nivel pre-sekundariu (Sekolah Menengah Pertama-SMP) iha tinan 1979 iha Ermera. Remata tiha primeiru ano pre-sekundariu iha Ermera, Samala-Rua transfere ba eskola pre-sekundariu ka Sekolah Menengah Pertama Katolik Paulus VI (SMPK Paulus VI) iha Díli no remata iha 1982. Durante tempu eskola, iha SMP, Samala-Rua mós tuir atividades Pramuka ka Boy Scout no hetan biban ba tuir Jamborim Nasional no Asia Pacific ne’ebé realiza iha Cibubur, Jakarta, iha fulan Juñu 1981. Alén de atividades Boy Scout ka pramuka José Neves Samala-Rua nu’udar aspirante Seminariu Menor Nossa Senhora de Fatima Lahane desde tinan 1981 no tama Seminariu iha 1982 ho estudos iha Ensinu Sekundariu Katolika São Jose (Sekolah Menengah Atas Katolik Santo Yoseph –SMAK St. Yoseph) Díli, husi 1982 to’o 1985.

Iha Seminario, Padre João Felgueiras, Reitor Seminario no Padre José Alves Martins (Kaer Metin), Diretor Espiritual enkoraza seminarista sira la’os estuda no reza deit, maibé buka hatene no refleta bebeik situasaun sosial no polítika povu Timor-Leste nian.

Samala-Rua hasai kursu iha eskola sekundariu iha tinan 1985. Samala-Rua kontinua nia estudu ba seminarista sai Frater hamutuk ho nia maluk na’in 24 iha Seminariu Maior Diosezanu Malang iha tinan 1986.

Iha tinan 1989 Amu Bispu Dom Carlos Filipe Ximenes Belo SDB, husu Samala-Rua ba halo estájiu iha Timor-Leste no kolokadu iha Seminariu Menor Lahane, to’o tinan 1990. Iha ne’ebá nia simu kargu nu’udar Vise-Prefeitu, hanorin Latin ba Seminaristas Primeiro Ano, psikolojia personalidade ba Segundo Ano no introdusaun Biblia ba Ano Prepedéutiku.

Durante periodu estajiu halo parte iha atividade movimentu klandestina OJETIL iha Timor-Leste liu husi atividades preparasaun no partisipasaun direta iha asaun manifestasaun hasoru Embaxador Estados Unidos America nian, John Monjo, ne’ebé vizita Timor-Leste iha 16 Janeiru 1990. Atividades seluk klandestina nian mak hanesan halo transkrisaun ba mensajen audiu hirak ne’ebé mai husi Comando Superior da Luta ne’ebé diriji ba responsavel sira ka populasaun sira iha vila laran. Iha Seminariu Maior Malang iha Jullu 1990 kontinua involve iha atividade klandestina RENETIL iha Malang.

Wainhira masakre Santa Kruz mosu iha Díli iha 12 Novembru 1991, Samala-Rua hamutuk ho nia kompaneiru lubuk ida iha Malang organiza estudantes husi Malang hodi ba halo manifestasaun iha Jakarta.

Samala-Rua kapturadu iha 19 fulan Maiu 1994. Hafoin kaer tiha nia, funumaluk sira sulan nia iha sela detensaun Polisia territoriu Malang nian, depois muda ba sela detensaun Polisia iha Surabaya. Husi Surabaya lori fila fali ba detensaun iha Malang no ikus liu muda ba prizaun jeral Lowokwaru Malang. Samala-Rua hetan akuzadu ho pena tinan 5, maibe iha sentensa final hetan pena tinan 4. Samala-Rua kumpri prizaun durante tinan 3 fulan 4.

Iha 2001-2002, sai koordenador programa RENETIL nian ba edukasaun sivika, monitorizasaun kampaña partidu polítiku no eleisaun Assembleia Constituinte no Assembly Watch, iha periodu ne’ebé Miguel Manetelu, atual Vise-Ministru Solidariedade Sosial, nu’udar Sekretariu-Jeral RENETIL nian. Samala-Rua rezigna-an iha Abril 2010 hodi asume kargu nu’udar Komisariu Adjuntu iha Komisaun Anti Korrupsaun (KAK) to’o Juñu 2016.

Samala-Rua licenciadu iha estudos filosofia no teologia iha Sekolah Tinggi Filsafat dan Teologi (STFT) ka [Instituto Superior Filosofia no Teologia] Widya Sasana Malang, Indonesia, iha tinan 1992.

Iha 2002 Samala-Rua hetan bolsas estudus husi Governu Britaniku, liu husi Chevening Scholarships ba halo estudos nivel mestradu iha Edukasaun no Dezenvolvimentu, iha East Anglia University, Norwich, Inglaterra no remata iha 2003. Husi Janeiru to’o Abril 2009,

Samala-Rua halo kursu kona-ba demokrasia iha Sentru de Estudus ba Seguransa no Diplomasia iha Birmingham University. Iha 2007 husi Agostu to’o Novembru Samala-Rua hetan Australian Leadership Award husi Governu Australia ne’ebé hala’o iha Victoria University, Melbourne durante fulan tolu.

Hafoin Aderito de Jesus Soares, Samala-Rua nia kompanheiro da luta iha RENETIL, simu posse nu’udar primeiru Komisariu KAK iha loron 22 fulan Fevereiru 2010, Samala-Rua hamutuk ho Manuel Bucar hetan konfiansa ba simu kargu nu’udar Komisariu Adjuntu, iha 16 Marsu 2010. Iha KAK Samala-Rua nu’udar Komisariu Adjuntu ba Edukasaun, Kampane no Peskiza husi 2010 to’o 2014. Hafoin halo remodelasaun iha Agostu 2015, Samala-Rua asume kargu nu’udar Komisariu Adjuntu ba Prevensaun no Sensibilizasaun to’o Junu 2016.

Tanba preokupa ho situasaun sosial no polítika ne’ebé evolui iha Timor-Leste no motivadu ho interese ba kompete iha eleisaun prezidensial 2017, Samala-Rua deklara rezignasaun husi Komisaun Anti-Korrupsaun, iha 22 Dezembru 2015, no hetan aprovasaun husi Komisáriu KAK iha 29 Juñu 2016, hodi kontinua kandidata-an ba Prezidenti Repúblika, hodi ba kompete iha eleisaun prezidensial 20 Marsu 2017.Isaias dos Santos Fernandes.

Jornal Nacional Diário