Família Bolseiru Cabo Verde Rejeita Opsaun KM

DILI, (TATOLI) – Família no inan-aman estudante timoroan sira ne’ebé hetan bolsa husi Ministériu Edukasaun (ME) hodi estuda iha Cabo Verde rejeita opsaun rua ne’ebé mak ME bazea ba desizaun Konsellu Ministru (KM) fó ba sira-nia oan.

Reprezentante família no inan-aman, Rui Batista Dias hateten, sira kontra no rejeita opsaun rua ne’e tanba konsidera iha implikasaun negativu ne’ebé maka’as tebes ba bolseiru sira-nia futuru.

“Tanba ida ne’e, ami inan-aman no família bolseiru hakarak hato’o ami-nia ezijénsia”, hatete Rui Batista Dias liu husi konferénsia imprensa iha Kampu Alor, ohin.

Ezijénsia ne’ebé ejize mak husu ba governu Timor-Leste, liuhusi ME atu foti solusaun ne’ebé justu no kredivel ba bolseiru sira.

Ba Primeiru-Ministru, Rui Maria de Araújo atu labele aseita desizaun ikus ne’ebé ministru edukasaun, António da Conceição foti atu lori fila bolseiru mai Timor-Leste no hakotu kontratu bolsu estudu.

Ba Prezidente Repúblika, Francisco Guterres Lú Olo atu labele legaliza ka promulga desizaun ikus ME nian maibé fó atensaun ba ME atu rezolve problema ne’e ho di’ak, nune’e iha nia sustentabilidade ne’ebé mak seguru.

Ho ezijénsia ne’e, reprezentante família no inan-aman, Rui Batista Dias husu ba governu Timor-Leste liuhusi ME atu muda urjente bolseiru sira iha Cabo Verde ba Portugal no Brasil hodi kontinua sira nia estudu. “Ami lakohi ami-nia oan sira sai vítima”, reforsa.

Hodi haklaken katak bainhira sira-nia ezjizénsia ne’e la atende mak sei lori kazu ne’e ba Prezidente Repúblika (PR) tanba PR mak aman ba nasaun.

“Nu’udar inan-aman ho triste boot hakarak hato’o ami-nia rekomendasaun ba VII governu konstitusionál ne’ebé atu mai dadauk, bele tau konsiderasaun ho sentimentU boa fé hodi rezolve tui rami-nia ezijénsia”, rekomenda.

Relasiona ho preokupasaun ne’e, ohin, Ajénsia Tatoli tenta atu konfirma ho ME maibé seidauk konfirmadu tanba ME la iha fatin.

Entretantu, problema bolseiru timoroan iha Cabo Verde, antes ne’e, Ministru Edukasaun, António da Conceição ho ekipa FDCH (Fundo Desenvolvimento Capital Humano) halo ona enkontru ho Primeiru-ministru, Rui Maria de Araújo hodi aprezenta relatóriu kona-ba medida ne’ebé atu hola ba kondisaun estudante bolseiru timoroan iha Cabo Verde.

“Investigasaun kona-ba kondisaun estudante sira, ohin lori relatóriu hodi ba aprezenta ba primeiru-ministru hodi informa kona-ba medida saida mak atu hola”, tenik Conceição iha Palásiu Governu.

Estudante na’in 43 mak eskola iha Cabo Verde mas kuandu ekipa investigasaun ba haree, estudante na’in 20 de’it mak hakarak kontinua nia estudu no na’in 23 hakarak atu fila mai Timor-Leste.

Alende ne’e husu Ministériu Edukasaun haruka funsionáriu ida atu ba iha Cabo Verde hodi halo observasaun no akompañamentu ba estudante sira to’o dezembru nia laran hodi nune’e bele haree se estudante sira atu hakarak kontinua ka fila.

Jornalista: Rafy Belo | Editora: Rita Almeida

Foto: Família no inan-aman bolseiru sira iha Cabo Verde halo konferénsia imprensa. Foto Tatoli: Rafy Belo